दमक, असोज ९ ।
चुन प्रसाद दर्जी । अहिले ४७ वर्ष पुग्नु भएको छ । उमेर त उती घर्किसकेको छैन । तर रोगले उहाँलाई थिलथिलो पारेको छ । उमेर र वैशँ भएका बेला कतार र मलेशियाको चर्को घाममा पसिना बगाउनु भयो । सामान्य लेखपढ बाहेक शैक्षिक योग्यता कमजोर रहेपनि हातमा लुगा सिउने सीप थियो । त्यही सीप अनुसारकै अत्यन्तै न्यूनतम ज्यालामा विदेशमा एक दशक बिताउनु भयो ।
१० वर्ष विदेश बसेर कमाएको कमाईले आफूले विवाह गर्दा लागेको ऋण तिरेर एउटा सानो घर बनाउनु भयो । छोराछोरी पढाउन र घरको गर्जो टार्ने काममै धेरै पैसा सकियो । उति बचत भएन । खासगरी कतारमा लामो समय बिताउनु भएका चुनले कतारी रियालको सट्टा लाखौ खर्च गर्दापनि निको नहुने रोग लिएर फर्कनु भयो ।
पायल्स विग्रिएर भएको सो क्यान्सरको सुरु सुरुमा उपचार पनि हुँदै थियो । घर नजिकै रहेको अढाई कट्ठा जमिन बेचेर चिकित्सकले भनेजस्तै गरी अपरेशन गर्ने, उपचार गर्ने, औषधी गर्ने, किमो लगाउने काम भइनै रहेको थियो । केही विसेक पनि हुँदै नै थियो । तर एकापट्टि निको हुँदैगर्दा फेरि पेटपट्टि त्यस्तै प्रकृतिको क्यान्सर देखिन थाल्यो । प्रोष्टेटको क्यान्सर समेत देखा पर्यो । त्यसपछि भने चुनलाई अहिले उपचार गर्नै धौ धौ परेको छ । १२ वटा किमो लगाउनु पर्नेमा अहिले ६ वटा मात्रै लगाएर बसेको र बाँकी लगाउन जानै सक्ने अवस्था नरहेको भन्दै बिलौना गर्नु भएको छ ।
यतिसम्मको उपचारमै उहाँको ३० लाख बढि सकिइसक्यो । यसमध्येमा विदेशबाट कमाएर ल्याएको केही लाख रुपैँया खर्च भयो भने अपुग रकम छोराछोरीलाई धान फलाएर खुवाइरहेको अढाई कट्ठा खेत बेचेर गरियो । त्यसबाट पनि नपुगेर गाउँले र इस्टमित्रले पनि सहयोग गरेर उहाँले ५ वटासम्म किमो लगाउन सक्नु भएको छ । तर बाँकी ६ वटा लगाउन उहाँलाई निकै गाह्रो भयो । गाउँलेहरुले पटक पटक सहयोग उठाएर उपचार गर्न पठाए । तर किसान गाउँ भएकाले थप खर्च पनि संकलन गर्नै नसकिएको चुनका छिमेकी विर्खबहादुर बस्नेत बताउनु हुन्छ ।
एक जना छोरा , एकजना छोरी, श्रीमती र आमाको सहारा चुन अहिले आफैलाई बचाउँन अरुको सहारा खोजिरहनु भएको छ । कँहिबाट केही पार नलागेपछि कँही कोही दिलदारहरुले सहयोग गरी आफ्नो श्रीमान बचाइदिनु हुन्छ कि भन्ने आशामा उहाँकी श्रीमती कमला दर्जीले सहयोगका लागि अपिल गर्नु भएको छ ।
तपाईको सानो सहयोगले चुनको जीवन बाँच्न सक्छ । उहाँले आफ्नो परिवारलाई फेरि पनि सम्हाल्न सक्नु हुने छ । बुढी भएकी आमाको सहारा बनेर अन्तिम सम्मपनि काँध थाप्न सक्नु हुनेछ । त्यसैले उहाँलाई सहयोग गर्न चाहनु हुनेले उहाँको मोवाईल नम्बर ९८१८०१२३५३७ मा सम्पर्क गरी सहयोग गरिदिन यहि भिडियो मार्फत हामीपनि हार्दिक अपिल गर्दछौं ।
