दमक, कार्तिक २६
झापाको शिवसताक्षी नगरपालिका वडा नम्बर ४ मा रहेको पाथीभरा आधारभूत विद्यालयमा सोमबार निःशुल्क दन्त शिविर सम्पन्न भएको छ ।
दमक ५ स्थित बेलडाँगी रोडमा रहेको ओम शान्ति डेण्टलको प्राविधिक सहयोगमा सानो प्रयास यूवा समाजको आयोजनामा सम्पन्न शिविरमा पाथीभराका १ सय ५० जना विद्यार्थीले दाँत परीक्षण गराएका छन् ।
झण्डै २ सय जना विद्यार्थी अध्यनरत सो विद्यालयमा दशैं तिहारको लामो विदापछि विद्यालय खुलेकोले सबै विद्यार्थी नआएका कारण शत प्रतिशत विद्यार्थीले दाँतको परीक्षण हुन सकेन ।
शिविरपछि प्रतिक्रिया दिँदै अस्पतालका व्यवस्थापक कमल गैरेले भन्नु भयो ‘ग्रामिण क्षेत्रका बालबालिकाहरुमा दाँतको सुरक्षा सम्बन्धीको चेतना कम हुने र त्यसले गर्दा दाँतमा समेत विभिन्न समस्या आउने थाह पाएर त्यहाँ यो शिविर गरिएको हो ।’ शिविरमा परीक्षण गर्दा दाँतमा विभिन्न रोग देखिएको र त्यसको उपचार गर्न ३० प्रतिशतसम्म छुटको व्यवस्था गरिएको गैरेले जानकारी दिनुभयो ।
कार्यक्रममा शुभकामना मन्तव्य राख्दै प्रमुख अतिथी समेत रहनु भएका कोशी प्रदेशका सांसद राधाकृष्ण खनालले ओम शान्ति डेण्टलमा दाँतका विशेषज्ञ चिकित्सक रहेको र त्यस्ता चिकित्सकलाई नै गाउँ गाउँका शिविरमा लिएर हिडेकोमा प्रशंसा गर्दै भन्नु भयो ‘मेरो पनि दाँतको उपचार गर्ने ठाउँका डाक्टर नै आज हाम्रो गाउँमा आउनु भयो ।’
