दमक, २६, चैत / स्तनमा क्यान्सर भएर गत साउनदेखि निरन्तर उपचार गराइरहनु भएकी दमक ५ निवासी गोमादेवी कार्की कटुवाललाई आर्थिक सहयोग गरिएको छ ।
अटो मोवाइल्स संघ दमक नगर कमिटीले संकलन गरेको ९८ हजार ६ सय रुपैयाँ मंगलबार देवीका श्रीमान निर्मल कटुवाललाई हस्तान्तरण गरिएको हो ।
निर्मल अटो मेकानिक भएको र श्रीमतीको उपचारमा आर्थिक अभाव भएको थाहा पाएपछि संघले दमकमा रहेका अटो व्यवसायीमार्फत नगद संकलन गरेर सहयोग गरेको संघका अध्यक्ष बुद्धिसागर बरालले जानकारी दिनुभयो ।
संघले संकलन गरेको सो रकम दमक उद्योग वाणिज्य सघंका बरिष्ठ उपाध्यक्ष राजु खड्काको उपस्थितिमा कटुवालको घरमै पुगेर वितरण गरिएको हो ।
आर्थिक अवस्था कमजोर भएको र पछिल्लो समय अस्पतालबाट डिस्चार्ज गरेर घर ल्याउन समेत रकम अभाव भएपछि आर्थिक संकलन गर्नुपरेको कटुवालले सो क्रममा बताउनु भएको थियो ।
