दमक । २५, बैशाख । झापाको दमक नगरपालिका वडा नम्बर १० मा रहेको एक विद्यालयका छात्र तथा छात्राहरुलाई निशुल्क साइकल वितरण गरिएको छ । दमक नगरपालिकाले दमक १० स्थित श्री पशुपति आधारभूत विद्यालयमा अध्यनरत छात्र, छात्राहरुलाई निशुल्क साइकल वितरण गरेको हो ।
देशको परिचय देश विकासको मूल आधार शिक्षा हो भने शिक्षा विकासको मुख्य आधार विद्यालय तह शिक्षा नै हो । विद्यालय शिक्षा गुणस्तरीय व्यवहारिक र वैज्ञानिक बनाउँदै लग्यो भने विश्व प्रतिस्पर्धाकाका लागि यहाँको शिक्षा योग्य हुन पुग्दछ । विश्व प्रतिस्पर्धायुक्त शिक्षाका लागि विद्यालय तहदेखि नै बनाउँदै लैजानु राज्यको प्रथम दायित्व हो । तर, नेपालको शन्दर्भमा हेर्ने हो भने अहिले बिद्यार्थी ड्रप आउटको समस्या अधिक देखिन्छ ।
बिबिध कारणले विद्यार्थी ड्रप आउट अर्थात बिचैमा विद्यालय छाड्ने गरेको पाएपछि दमक नगरपालिकाले भने भिन्न भिन्न योजना अघि बढाउदै विद्यार्थीलाई विद्यालयमै टिकाईराख्ने जुक्ती निकालिरहेको छ ।
यसै शन्दर्भमा दमक नगरपालिका वडा नम्बर १० स्थित श्री पशुपति आधारभूत विद्यालयमा अध्यनरत छात्र तथा छात्राहरुलाई निशुल्क साईकल वितरण गरेको छ । बिहिबार विद्यालय परिसरमै आयोजित एक कार्यक्रमका बिच दमक नगरपालिकाकी उपप्रमुख रेगिना भट्टराई प्रशाईको प्रमुख आतिथ्यतामा १६ थान साइकल विद्यार्थीहरुलाई वितरण गरियो ।
विद्यार्थीहरुलाई टाढा टाढाबाट आउन समस्या भईरहेको अवस्थालाई देखेर नगरपालिकाले गरेको सहयोगले विद्यार्थीहरुलाई हौसला मिलेको विद्यालयका प्रधानाध्यापक सिताराम निरौला बताउनुहुन्छ ।
भौगोलिक हिशाबले पनि केहि समस्या रहेको र बर्खा याममा नदि पारीबाट आउनुपर्ने विद्यार्थीहरुलाई असहज हुने गरेको गुनाशो पछि नगरपालिकाकी उपप्रमुखको सक्रियतामा बिद्यार्थीहरुलाई साईकल वितरण गरेपछि धेरै हदसम्म विद्यार्थीका ति समस्या समाधान हुनेमा आफु आशाबादी रहेको बताउनुहुन्छ दमक १० का घनश्याम खनाल ।
मानबीय बिकासको पूर्वाधार भनेकोनै शिक्षा रहेको र शिक्षामा लगानी बढाउनुपर्ने बताउनुहुदै दमक नगरपालिकाकी उपप्रमुख रेगिना भट्टराई प्रशाईले विद्यार्थीहरु ड्रप आउट नहुन भन्ने उदेश्यलेनै उनीहरुलाई साइकल वितरण गरिएको जानकारी गराउनुभयो ।
शिक्षा पवित्र भएकोले एवम् शिक्षा सबैको आधारभूत आवश्यकता भएकाले राज्यले गर्दै आएको शिक्षामा लगानी वृद्धि गरिनुपर्ने हुन्छ । आजका कलिला बालबालिका तथा मुना यो देशका भविष्यका कर्णधार र देशका परिचय हुन् ।
यिनीहरु माथि राज्यले सक्दो लगानी गरेर शिक्षा सबैको साझा बनाउनु पर्दछ । शिक्षामा लगानी गरेको कतै खेर जाँदैन त्यो राज्यमै रहन्छ । शिक्षा राज्यको अमूल्य सम्पत्ति हो भन्ने कुरालाई ख्याल गरिन आवस्यक छ ।
