दमक, ३, जेठ । सरकारले ल्याएको स्वास्थ्य बीमा कार्यक्रममा सेवाग्राहीले सुविधा भन्दा बढि सास्ती खेप्नु परिरहेको छ । स्वास्थ्य बीमा हरेक सेवाग्राहीका लागि नखाउ भने दिनभरीको शिकार खाउँ भने कान्छा बाउको अनुहार भनेझै भइरहेको छ ।
स्वास्थ्य बीमा कार्यक्रम मार्फत ५ जनासम्मको परिवारको ३ हजार ५ सय रुपैयाँ बुझाएपछि त्यस घरमा रहेका सदस्यले १ लाख रुपैयाँ बराबरको औषधि उपचार सरकारले तोकेको अस्पतालमा निःशुल्क उपचार गर्न पाइन्छ ।
बोर्डले बीमा कार्यक्रमका लागि देशभरिका सरकारी र निजी गरी ४ सय ४० अस्पताललाई सूचीकृत गरेको छ । ती अस्पतालमा उपचार बीमा लागू गरेका परिवारका सदस्यले वार्षिक १ लाख रुपैयाँसम्मको निःशुल्क उपचार गराउँन पाउँछन । उक्त बीमाको प्याकेज अर्थात सुविधा थैली अनुसार अस्पतालले १ हजार १ सय ३३ प्रकारका औषधि उपलब्ध गर्नुपर्छ । तर, अस्पतालले बिरामीलाई मापदण्ड भित्र परेका औषधि नदिएको गुनासो सुनिन्छ । त्यतिमात्र होइन, झापामा भने कर्मचारी अभावले बिमित सेवाग्राहीको डाटा ईन्ट्रिनै नभएपछि सेवाग्राहीले सास्ती मात्र पाइरहेका छैनन्, सेवा लिन अस्पताल पुगेपनि रित्तो हात फर्कनुपर्ने अवस्था सिर्जना भएको छ ।
झापा दमकका किरण पाण्डे स्वास्थ्य बीमाको कार्ड लिएर दमक अस्पताल पुग्दा अचम्ममा पर्नुभयो । उहाँलाई स्वास्थ्य बीमानै नवीकरण नभएको जानकारी अस्पतालको काउन्टरमा बसेका कर्मचारीबाट आयो । उहा अचम्ममा पर्नुभयो । किनकी उहाले महिनौं अघि नवीकरणको रकम बुझाइसक्नुभएको थियो । तर, कर्मचारी अभाव देखाउदै नवीकरणको डाटा ईन्ट्रिनै नगरिदिएपछि उहाँले सास्ती भोग्नुपर्यो । आक्रोशित हुदै उहाँले सरकारले नागरिकलाई सेवा दिएको हो कि सास्ती दिएको भन्दै प्रश्न गर्नुभयो ।
यस बिषयमा बुझ्न स्वास्थ्य बीमा बोर्ड झापा जिल्ला सम्पर्क कार्यालय संयोजक लक्ष्मी कंडेललाई हामीले पटक पटक सम्पर्क गर्यौ । तर, उहाँको फोन उठेन । यस्तै कार्यालयको नम्बरमा पनि हामीले पटक पटक सम्पर्क गर्यो त्योपनि उठेन । यतिमात्रै होइन, बीमा कार्डको पछाडीपट्टी दिइएको टोल फ्रि नम्बरमा समेत हामीले सम्पर्कको प्रयास गर्यौ तर, त्यो टोल फ्रि नम्बरमा पनि सम्पर्क हुन सकेन ।
नागरिकलाई सेवा दिन भनेर बसेकाहरुले सेवाग्राहीकै पनि फोन समेत नउठाउने गरेको पीडित सेवाग्राहीहरुको गुनासो छ। यस बिषयमा सम्बन्धित सरोकारवालाको बेलैमा ध्यान पुग्न आवश्यक देखिन्छ । नत्र स्वास्थ्य बीमा कार्यक्रमपनि हात्ती आयो हात्ती आयो फुस्सा भनेझै मात्र नहोला भन्न सकिन्न ।
