धरान । धरानमा ६० वर्षभन्दा माथिका नागरिकलाई कोभिसिल्ड खोपको बुस्टर डोज दिन लागिएको छ ।
माघ २५ र २६ गते धरानका तीन स्थानमा खोप लगाउने तयारी भएको धरान उपमहानगर स्वास्थ्य महाशाखाले विज्ञप्ति जारी गर्दै जानकारी गराएको छ । महाशाखा प्रमुख उमेश मेहताका अनुसार यसअघि कोभिसिल्डको दुई खोप पूरा गरेका नागरिकलाई यो खोप दिन लागिएको हो ।
त्यस्तै अग्रपङ्क्तिमा खटिने स्वास्थ्यकर्मी, सफाइकर्मी, जनप्रतिनिधि, पत्रकार र सार्वजनिक सेवा प्रवाहमा खटिएका जनशक्तिलाई पनि बुस्टर डोज दिइने जनाइएको हो ।
नगरका अनुसार धरान–१ को पुरानो अस्पताल, धरान–१५ को आधारभूत स्वास्थ्य चौकी र धरान–१८ को वडा कार्यालयमा खोप लगाइने भएको छ । खोप लगाउन आउनेलाई अनिवार्य रूपमा दुई डोज पूरा गरेको खोप कार्ड ल्याउनका लागि आग्रह गरिएको छ ।
