दमक, २९ जेठ / भोलि शुक्रबार रिलिज हुने नेपाली कथानक चलचित्र ‘महाभोज’को अग्रिम टिकट बुकिङ खुला भएको छ ।
देशभरका मल्टिप्लेक्स तथा सिङ्गल स्क्रिन रहेका चलचित्र हलहरूले बुकिङ खुलाएका हुन् । सहकारी पीडितको कथामा बनेको चलचित्रले प्रारम्भिक चरणमा करिब २ सय शो प्राप्त गरेको छ । चलचित्रको काठमाडौँ, पोखरा र बुटवलमा प्रिभ्यु प्रिमियर भइसकेको छ । प्रिमियरबाट चलचित्रले सकारात्मक प्रतिक्रिया प्राप्त गरेको छ ।
जेठ १५ गते रिलिज गर्ने तय भएको चलचित्र विभिन्न राजनीतिक तथा अन्य आन्दोलनहरूका कारण रिलिज सरेर जेठ ३० गते पुगेको हो ।
विकास सुवेदीको लेखन, दिनेश राउतको निर्देशन रहेको चलचित्रमा सुरक्षा पन्तको विशेष भूमिका रहेको र चलचित्रमा आर्यन सिग्देल, दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ, बुद्धि तामाङ, कमलमणि नेपाल, मोहन निरौला, वसुन्धरा भुसाल, पुष्कर गुरुङ, विनोद न्यौपाने, आभा अर्याललगायतको अभिनय छ ।
क्लक वर्क क्रियशन र पिक्चर फ्रेमले निर्माण गरेको सो चलचित्रका निर्माता हिमाल कडरिया रहनु भएको छ ।
