दमक, ७ असार । दमकको कृष्ण मन्दिर–टुक्रे–धराने टोल–पिङ्डाँडा टोल–आमबारी हुँदै इटहरा रोडसम्म जोड्ने बहुवर्षीय कालोपत्रे तथा डेन निर्माण योजना अन्तर्गत कृष्ण मन्दिर–टुक्रे खण्डको सडक निर्माण कार्य अन्तिम चरणमा पुगेको छ ।
दुई चरणमा ठेक्का सम्झौता गरिएको यस योजनाको पहिलो खण्डका कामहरू तीव्र गतिमा सम्पन्न भइरहेका छन् ।
शनिबार कोशी प्रदेश पूर्वाधार विकास समितिका सभापति होमबहादुर थापाले सो सडक खण्डको स्थलगत अनुगमन गर्नुभएको थियो । उहाँले निर्माण प्रक्रियाबारे जानकारी लिनुका साथै आगामी असार मसान्तभित्र काम सकिने योजना रहेको बताउनुभयो ।
कृष्ण मन्दिर–टुक्रे सडक विगतमा अत्यन्त जिर्ण अवस्थामा रहेको र बर्खाको समयमा हिलो र अवरोधका कारण आवागमनमा समस्या हुने गरेको स्थानीय बताउँछन् । अहिले भने डेनसहितको कालोपत्रे सडक निर्माण भइरहेकाले सर्वसाधारणमा उत्साह देखिएको छ ।
दुई महिनामै तीव्र गतिमा काम भएको भन्दै टुक्रे टोल विकास संस्थाका अध्यक्ष माधव सिटौलाले निर्माणसँग संलग्न सबैलाई धन्यवाद व्यक्त गर्नुभयो । उहाँले यस्तो गति अन्य विकास निर्माणमा पनि देखिनुपर्ने धारणा राख्नुभयो ।
यो सडक नजिकैका घना बस्ती, विद्यालय, व्यवसायिक केन्द्र र दमकबाट टाढा गएका यात्रुहरुको लागि वैकल्पिक र सहज मार्ग हो । सडक स्तरोन्नतिले यातायातका साधनलाई भरपर्दाे बनाउने विश्वास गरिएको छ । दमक नगरपालिकाको पूर्व–पश्चिम जोड्ने रणनीतिक सडक अहिले मात्र होइन, दीर्घकालीन व्यापार र आवागमन सुगम बनाउने एक महत्वपूर्ण पूर्वाधार बन्ने देखिएको छ ।
