दमक, १४ असार / दमक नगरपालिका वडा नम्बर ५ को भित्री सडकहरू अहिले सौन्दर्यतर्फ उन्मुख छन् । जहाँ पहिले धुलो र हिलोमा गाडी गुड्थे, अहिले त्यही सडकहरूमा आकर्षक ढाँचामा लकिङ टायल बिछ्याउने अभियान तीव्र गतिमा अघि बढेको छ ।
विशेषगरी ती स्थानहरू जहाँ यातायातसहितका साधनको चाप कम हुन्छ वा चाल नै नगर्ने, त्यस्ता ठाउँमा लकिङ टायल प्रयोग गरिँदैछ । यसले सडक सुन्दर देखिन्छ, बरु स्थानीय बासिन्दाको पनि आत्माभिमान बढेको छ । “गाउँ पनि सहर जस्तै बनोस’ भन्ने भावना यही अभियानमा देखिन्छ ।
वडाका विभिन्न टोलहरूमा अहिले धमाधम सडक निर्माण भइरहेका छन् । शान्तिभूमि टोल जस्तो ठाउँमा अहिले प्रदेश सरकारको बजेटमा लकिङ टायल बिछ्याउने कार्य भइरहेको छ । वडा सदस्य शोभा बेलबासे भन्नुहुन्छ, “वडाको बजेट सीमित छ । त्यसैले हामी प्रदेश सरकारको सहयोगमा यसरी ठूलो लगानीका योजना अघि बढाइरहेका छौं ।’’
त्यस्तै यलम्बर चोकदेखि मोडल क्याम्पस हुँदै मालपोत कार्यालय जाने सडक अहिले ड्रेनसहित कालोपत्रे गरिएको छ । यस सडकका साइडमार्गहरू भने लकिङ टायलमार्फत अझ आकर्षक बनाइँदै छन् । यस्तो प्रयासले दमक ५ का भित्री मार्गहरूलाई व्यवस्थित बनाउनुका साथै आधुनिक रूप दिन सहयोग पुर्याइरहेको छ । यद्यपि केही सहायक सडकहरू भने अझै निर्माणको पर्खाइमा छन् । यसबारेमा स्थानीयवासी कमल दाहाल भन्नुहुन्छ “सबै जनालाई आफ्नो घरअगाडिको बाटो पहिला बनोस् भन्ने चाहना हुन्छ, तर स्रोत र प्राथमिकताका आधारमा काम गरिन्छ भन्ने बुझ्न जरुरी छ । यद्यपि यी अधुरा योजनाहरुले चाँडै सम्पन्नता पाओस् ।’
वडाका कार्यवाहक अध्यक्ष खड्ग राईका अनुसार, पूर्वाधार विकासमा वडाको मात्र होइन, नगर, प्रदेश र संघीय सरकारको पनि साझेदारी आवश्यक रहेको उल्लेख गर्दै सबै तहसँग समन्वय गरेर काम गरिरहेको बताउनु भयो ।
सडक विकाससँगै जनअपेक्षा र जिम्मेवारीको समन्वय आवश्यक
दमक ५ मा लकिङ टायल अभियानले भौतिक पूर्वाधारसँगै जनताको जीवनशैलीमा समेत परिवर्तन ल्याउने अपेक्षा गरिएको छ । तर जनअपेक्षा सँगसँगै जिम्मेवार नागरिकको भूमिका र सरकारबीचको सहकार्य अझ प्रभावकारी बनाउन सकियो भने यस्ता अभियान अझै दिगो र सफल बन्न सक्छन् ।
