उर्लाबारी, २० असार / उत्तरपूर्वी मोरङको उर्लाबारी नगरपालिका वडा नम्बर ६ मा अबको केही समयपछि एक अत्याधुनिक बसपार्कको निर्माण कार्य थालिने भएको छ ।
भविष्यको यातायात पूर्वाधारलाई ध्यानमा राख्दै निर्माण हुन लागेको यो बसपार्क १८ महिनाभित्र पूर्णरूपमा सम्पन्न गरिने लक्ष्य लिइएको छ ।
परियोजनाको निर्माण कार्यका लागि औपचारिक सम्झौता भइसकेको छ । उर्लाबारी नगरपालिकाका प्रमुख प्रशासकीय अधिकृत अभयकुमार गुप्ता र निर्माण व्यवसायी नविन गौतमबीच सम्झौतामा हस्ताक्षर भएको छ ।
११ करोड ३ लाख ८५ हजार ८ सय ८० रुपैयाँ २५ पैसाको लागतमा निर्माण हुने सो बसपार्कको जिम्मा अभी डिजाइनर्स एण्ड डेभलपर्स प्रा.लि., हेटौंडालाई दिइएको छ । परियोजनाको ३० प्रतिशत उर्लाबारी नगरपालिकाको लगानी, १० प्रतिशत अनुदान स्वरूप नगर विकास कोषबाट र ६० प्रतिशत नगर विकास कोषको ऋण मार्फत वित्तीय संरचना तय गरिएको छ ।
सम्झौता कार्यक्रममा नगर प्रमुख गंगाप्रसाद खरेल, उपप्रमुख मीना कुमारी खतिवडा, इञ्जिनियर पोखराज साह, रोशन उदास, योजना तथा अनुगमन शाखाका प्रमुख विकास दाहाललगायत अन्य जनप्रतिनिधिहरूको उपस्थिति थियो ।
परियोजना सम्पन्न भएपछि उर्लाबारीको यातायात व्यवस्थापन व्यवस्थित हुने र नगरको व्यापार, पर्यटन तथा रोजगारी प्रवद्र्धनमा पनि महत्वपूर्ण योगदान दिने विश्वास गरिएको छ ।
