दमक नगरपालिकाले चालु आवमा २४ करोड ७७ लाख ८३ हजार ३६१ रुपैयाँ राजस्व संकलन गर्ने लक्ष्य राखेकोमा १८ करोड ७४ लाख ५९ हजार २५६ रुपैयाँ मात्र संकलन गर्न सफल भएको छ । यो संकलन, लक्ष्यको ७५.६५ प्रतिशत मा सीमित छ ।
यद्यपि, अघिल्लो वर्षको तुलनामा राजस्व संकलनमा सुधार देखिएको छ । आर्थिक वर्ष २०८०/०८१ मा नगरले २० करोड ९२ लाखको लक्ष्य राखेर १७ करोड ९३ लाख संकलन गर्न सकेको थियो । राजस्व संकलनको यो क्रमिक वृद्धि सन्तोषजनक रहेको दमक नगरपालिकाका राजस्व अधिकृत डम्बरराज बराल बताउनुहुन्छ ।
दमक नगरपालिकाको कुल बजेट हेर्ने हो भने आव २०८१/०८२ मा १ अर्ब ६३ करोड २३ लाख २३ हजार रुपैयाँ को बजेट थियो । यसमध्ये ६७ करोड ५२ लाख २९ हजार २५७ रुपैयाँ चालु खर्चमा र ६२ करोड ६८ लाख ८२ हजार रुपैयाँ पुँजीगत खर्चमा भएको देखिन्छ । यसरी कुल १ अर्ब २० करोड २१ लाख ११ हजार रुपैयाँ खर्च गरिएको छ ।
यो तथ्यांकले देखाउँछ कि नगरको आम्दानीभन्दा खर्च बढी भएको छ । तर दमक नगरपालिकाका वरिष्ठ लेखा अधिकृत देवी प्रसाद कोईराला भन्छन्— यो खर्च अनुत्पादक नभई नगर विकासमै केन्द्रित भएको छ ।
नगरको बढ्दो खर्च, विकासको नाममा भइरहेको लगानी, र लक्ष्यअनुसार राजस्व संकलन हुन नसकेको विषयले अब दमक नगरपालिकाको योजना र कार्यशैलीलाई अझ प्रभावकारी बनाउनुपर्ने आवश्यकता देखिएको छ ।
