दमक, १ साउन | हिन्दु धर्ममा श्रावण महिनालाई एक पवित्र महिना मानिन्छ । यो महिना भगवान शिवको आराधनाको लागी विशेष महिनाको रुपमा पनि लिने गरिन्छ । यो महिनालाई लुतो फाल्ने महिना समेत भन्ने गरिन्छ । महिलाहरु विभिन्न मनोकामना राख्दै श्रावण महिनाभरि हरेक सोमबार ब्रत बस्छन् । तर, यो ब्रत के का लागी त ? यसको तथ्य उजागर गर्दैछाै ।
अरु महिनाको तुलनामा श्रावण महिनामा मन्दिरहरुमा भक्तजन साथै ब्रतालुहरुको भिड निकै बढ्ने गर्छ । हिन्दु धर्म मान्ने अधिकांश महिलाहरुले श्रावणमा ब्रत बसेका हुन्छन् । श्रावण महिनाको हरेक सोमबार बिहानै उठेर शुद्ध भई बेलपत्र, दूध, जल र धुप सहित मन्दिरमा भग्वान शिवलाई अर्पण गर्छन् ।
आफ्नो श्रीमानको दिर्घायु एंव सुस्वास्थको कामना गर्दै भन शिवलाई प्रसन्न पार्न श्रावणको ब्रत बस्ने गरेको धारणा राख्नुहुन्छ दमक ६ को पशुपति मन्दिरमा भेटिनुभएकी ब्रतालु शुसिला गौतम ।
असारको बेला धान रोप्दा लागेको हिलोले गर्दा लुतोको साथै अरु विभिन्न छाला सम्बन्धीको रोग लाग्ने गरेको र श्रावण महिनामा सफा भएर भगवान शिवको आराधना गर्दा त्यो रोग जाने भएकाले यो महिनालाई लुतो फाल्ने महिनाको रुपमा लिने गरेको विश्वास राख्नुहुन्छ ब्रतालु साथै पशुपति आध्यात्मिक महिला समूहको अध्यक्ष समेत रहनुभएकी रीता थापा ।
श्रावण महिनाको महिमा र महत्वको बारे जानकारी दिनुहुदै दमकको हनुमान मन्दिरका पुजारी जीवन सुवेदी । श्रावण महिना केवल धार्मिक परम्परा मात्र होईन, शुद्ध मन, समर्पण र आस्थाको प्रतिक पनि हो ।
