दमक, १८, साउन । दमक नगरपालिकाले हालै तीन दिनसम्म दमक क्षेत्रमा सञ्चालनमा रहेका विभिन्न उद्योग र पसलहरूमा व्यापक अनुगमन गरेको छ। नगरबासीबाट आएको गुनासो, बजारमा अखाद्य वस्तु बिक्री भइरहेको, स्वच्छता अभाव, तथा मापदण्ड विपरीत व्यवसाय सञ्चालन भइरहेकोलाई मध्यनजर गर्दै नगरपालिकाले अनुगमन कार्य अघि बढाएको हो।
नगर उप–प्रमुख रेगिना भट्टराई प्रसाईको अगुवाइमा, खाद्य प्रविधि तथा गुणस्तर नियन्त्रण कार्यालय बिराटनगरको प्राविधिक टोलीको सहकार्यमा अनुगमन गरिएको थियो। टोलीले विशेषगरी औषधी पसल, डेरी उद्योग, पानी उद्योग तथा मिठाई पसलहरूमा निरीक्षण गरेको हो।
अनुगमनका क्रममा विभिन्न डेरी उद्योगहरूमा म्याद गुज्रिएका खाद्य वस्तु फेला परे। ती वस्तुहरू तत्काल जफत गरी सुरक्षित रूपमा नष्ट गरिएको थियो । म्याद गुज्रिएका वस्तु बजारमा पठाउने काम गम्भीर अपराध भएको भन्दै नगरपालिकाले यस्तो कार्य दोहोरिएमा कडा कारबाही गरिने चेतावनी पनि दिएको छ। त्यस्तै मिठाई पसलहरूमा स्वच्छताको कमी भेटिएको थियो।
कतिपय पसलमा खाद्य सामग्री ढाकेर नराखिएको, कीरा लाग्ने सम्भावना देखिएको, तथा श्रमिकहरूले अनिवार्य पोशाक र पञ्जा प्रयोग नगरेको पाइयो। सोही कारण, ती पसलहरूलाई रु १५,००० देखि ५०,००० सम्म जरिवाना गराइएको नगरपालिकाले जनाएको छ। केही व्यवसायीहरूलाई चेतावनी दिइएको छ र स्वच्छता सुधार्न निर्देशन पनि दिइएको छ।
पानी उद्योगहरूमा गरिएको अनुगमनमा भने सकारात्मक पाटो देखिएको छ। अधिकांश पानी उद्योगहरू मापदण्डअनुसार संचालन भइरहेको पाइयो। यद्यपि, केही उद्योगहरूमा सामान्य सुधारको खाँचो देखिएको अनुगमन टोलीको भनाइ छ ।
खाद्य अधिकृतहरूद्वारा स्थलगत गुणस्तर मापन र लाइभ टेस्ट समेत गरिएको थियो । दूध, पानी र प्याक गरिएका खाद्य वस्तुहरूमा परीक्षण गर्दा अधिकांशमा गुणस्तरीयता कायम रहेको देखियो, तर केही वस्तुमा सावधानी अपनाउनु पर्ने सुझाव पनि दिइएको छ।
नगर उप–प्रमुख प्रसाईले यो अनुगमनलाई चेतावनीको रूपमा मात्र होइन, जनस्वास्थ्यको सुरक्षाको लागि निरन्तर गर्ने बताउनुभयो । उहाँले आगामी दिनमा अझ कडा अनुगमन र आवश्यक परे व्यवसायीक तालिमहरू समेत सञ्चालन गरिने जनाउनुभयो ।
यस प्रकारको अनुगमनले उपभोक्ताहरूलाई सुरक्षित, स्वच्छ र मापदण्डअनुकूल सेवा प्राप्त गर्न मद्दत गर्ने विश्वास नगरपालिकाले लिएको छ।
