दमक, १५ कार्तिक | केहि दिन देखी वेपत्ता भएका झापा शिवसताक्षी नगरपालिका–१०का ३२ वर्षीय सरोज शर्मा मृत अवस्थामा भेटिएका छन् ।
उनको शव झापाको झापा गाउँपालिका–५ स्थित हुलाकी राजमार्ग नजिक बिरिङ पुलमुनि गाडिएको अवस्थामा फेला परेको हो ।
वडा नम्बर १० का वार्ड सदस्य दीपक पोखरेलका अनुसार शनिबार बिहान घटनास्थलमा दुर्गन्ध फैलिन थालेपछि स्थानीयको सूचना आधारमा खाल्टो खनेर हेर्दा शव फेला परेको हो। शव सड्न थालेको अवस्थामा भेटिएको र साथमा रहेको नागरिकताका कारण परिवारले सनाखत गरेको पोखरलले जानकारी दिनुभएको छ ।
प्रारम्भिक अनुमान अनुसार सरोजको हत्या गरी घटना लुकाउनका लागि शव पुलमुनि गाडिएको हुनसक्ने बताइएको छ।
यसअघि सरोजले प्रयोग गर्दै आएको बा १३ च ३८६४ नम्बरको कार झापाको मेचीनगर–१३ चारआली भद्रपुर रोड नजिक हातेमालो सामुदायिक वनभित्र आगजनी गरिएको अवस्थामा फेला परेको थियो। आगलागीपछि कार पूर्णरूपमा जलेको अवस्थामा भेटिएको थियो।
शिवसताक्षीका सरोज शर्मा गत आइतबारदेखि सवारीसहित बेपत्ता भएका थिए। उनका बुबा सकलदेव शर्माका अनुसार छोरा र गाडी दुबै सम्पर्कविहीन भएपछि परिवारले खोजी कार्य अघि बढाएको थियो। पाँच दिनपछि कार आगजनी अवस्थामा भेटियो भने आठ दिनपछि शव पुलमुनि गाडिएको अवस्थामा फेला परेको हो ।
जिल्ला प्रहरी कार्यालय झापाका अनुसार घटनाबारे विस्तृत अनुसन्धान भइरहेको छ। प्रहरीका एक अधिकारीले भने,–‘आगजनी गरिएको गाडी र फेला परेको शवबीचको सम्बन्ध स्पष्ट भइसकेको छ।
प्रारम्भिक रूपमा यो हत्या गरी सब गाडिएको जस्तो देखिन्छ, तर घटनाको कारण र दोषी पत्ता लगाउन अनुसन्धान भइरहेको छ।
