दमक,१० पुस ।दमक नगरपालिकाको प्राङ्गण आज पन्चेबाजाको आवाजले गुन्जिएको थियो । पन्चेबाजाको तालसँगै लिम्बु समुदायको साकेला नाच, रंगीन अबिर, खादा ओढाइँदै गरेका खेलाडीहरू, र उत्साहले भरिएका दर्शक । सबैको अनुहारमा प्रतीक्षा झल्किन्थ्यो । यहाँबाटै सुरु हुँदै थियो, दमकको इतिहासमा पहिलो पटक राष्ट्रिय स्तरको ब्याडमिन्टन प्रतियोगिता ।
यही वातावरणबीच दमक नमूना ब्याडमिन्टन एकेडेमीको आयोजनामा, दमक नगरपालिकाको आर्थिक सहयोग र समन्वयमा “प्रथम दमक नमूना ब्याडमिन्टन च्याम्पियनसिप–२०८२” को दमक नगरपालिद्धारा उद्घाटन सम्पन्न भयो ।
नगरपालिकाबाट सुरु भएको स्वागत ¥याली पन्चेबाजा, साकेला नाच, स्काउटका विद्यार्थी, खेलाडी र खेलप्रेमीसहित नमूना एकेडेमीसम्म पैदल अघि बढ्यो। सुरक्षामा नेपाल प्रहरी र नगर प्रहरीले साथ दिए ।
कार्यक्रमका प्रमुख अतिथि दमक नगरप्रमुख रामकुमार थापाले प्रतियोगिताले दमकलाई खेल क्षेत्रमा नयाँ पहिचान दिलाउने विश्वास व्यक्त गर्नुभयो ।
विशिष्ट अतिथि उप–प्रमुख रेगिना भट्टराई प्रसाईँ, विभिन्न वडाध्यक्ष र छिमेकी पालिकाका प्रतिनिधिहरू पनि उपस्थित थिए, जसले कार्यक्रमलाई झनै भव्य बनायो ।
प्रतियोगिता पुस १० गतेदेखि १२ गतेसम्म सञ्चालन हुनेछ। यस तीन दिने प्रतियोगितामा नेपालसहित छिमेकी राष्ट्रका करिब ४ सय खेलाडी सहभागी भएका छन्। खेलाडीहरू सात विधामा प्रतिस्पर्धा गर्नेछन्। खेलाडीसँगै प्रशिक्षक र खेलप्रेमीहरू यस प्रतियोगितालाई अवसर, प्रतिस्पर्धा र प्रेरणाको मञ्चका रूपमा हेर्दैछन्। अब तीन दिनसम्म दमक रोमाञ्चक खेल प्रतिस्पर्धाको केन्द्र रहनेछ, र अन्त्यमा को बन्ला च्याम्पियन भन्ने उत्सुकता झनै बढ्दै गइरहेको छ।
