पथरी, २४ चैत / मोरङको पथरी शनिश्चरे नगरपालिका वडा नं. ३ स्थित संगम चोक पूर्वमा चैत २८ गते दोस्रो संगिनी महोत्सव आयोजना हुने भएको छ ।
नेपालमा मौलिक तथा लोपोन्मुख संगिनीको संरक्षणमा लागिपरहेको श्री महिला जागरुक हरिकिर्तन तथा संगिनी समूहको आयोजनामा महोत्सव हुन लागेको हो । महोत्सवले स्थानीय कला, संस्कृति तथा परम्परागत संगिनी नृत्यलाई संरक्षण र प्रवद्र्धन गर्ने उद्देश्य राखेको संस्था अध्यक्ष देवीमाया पोखरेलले जनाउनु भयो ।
कार्यक्रममा विभिन्न स्थानका महिलाहरूको सहभागितामा संगिनी नृत्य, सांस्कृतिक प्रस्तुति तथा भजन–किर्तन प्रस्तुत गरिनेछ । महोत्सवले स्थानीय समुदायबीच आपसी सद्भाव, सांस्कृतिक पहिचान र महिला स–शक्तिकरणलाई अझ मजबुत बनाउने अपेक्षा गरिएको छ ।
यसखाले मौलिक संस्कृति संरक्षणमा वडाले सदा साथसहयोग पुर्याइरहने पथरी शनिश्चरे ३ का अध्यक्ष विजय लिम्बूले वचनवद्धता व्यक्त गर्नुभयो ।
०६२ माघ १८ गते भजन किर्तन गर्न धार्मिक कार्यमा सघाउन रेणुकादेवी काफ्ले अध्यक्ष रहेर स्थापना भएको महिला जागरुक हरिकिर्तन समूह २०७६ बाट संङ्गिनी नाचको संरक्षणमा जुट्न थाल्यो । २०८० साउन ३० गते दर्ता नम्बर ४६ मा पथरीशनिश्चरे नगरमा विधिवत दर्ता भएर कार्य गर्दै आएको छ । अर्थात नगरमा पहिलो पटक संगिनी समूह दर्ता भएको छ । महिला जागरुक हरिकिर्तन तथा सङ्गिनी समूहका रुपमा प्रत्येक हप्ताको मंगलबार साँझ संगिनी प्रशिक्षण कार्यक्रम चलाएर युवा पुस्तालाई यसको संरक्षणमा झकझकाएको थियो । संगिनी संरक्षणमा आमा समूह, बुहारी समूह र छोरी समूह बनाएर सङ्गिनी खेल्ने मात्र होइन नजिकका विद्यालयमा गई विद्यार्थीलाई पनि संगिनीको महत्व बुझाएर समूह मौलिक संस्कृति संरक्षणको जाँगरिलो उदाहरण बनेको छ ।
समूहले ०८१ फागुन १४ गते सम्भवत नेपालकै पहिलो संगिनी महोत्सवका रुपमा प्रथम संगिनी महोत्सव ३ नम्बर वडामै सम्पन्न गरेको थियो ।
लोपोन्मुख अवस्थामा रहेको बालन र नौमति बाजा संरक्षणमा पनि संस्थागत प्रयासमा सो वडावासी सक्रिय रहेका छन् ।
