दमक, १६ जेठ । झापाको दमकमा बोराभित्र बाँधिएको अवस्थामा एक महिलाको शङ्कास्पद शव फेला परेको छ। दमक नगरपालिका वडा नम्बर १० सेतुमाडीस्थित रतुवा खोलाको पुलमुनि बगिरहेको पानीमा महिलाको शव फेला परेको जिल्ला प्रहरी कार्यालय झापाले जनाएको छ। शनिबार बिहान स्थानीयबासीले खोलामा शव देखेपछि प्रहरीलाई खबर गरेका थिए। घटनाको जानकारी प्रहरीले बिहान १०ः३० देखि ११ः०० बजेको आसपासमा पाएको थियो। शव भेटिँदा महिलाको कपाल र हात बोरा बाहिर निक्लिएको र बाँकी शरीर भने सेतो प्लास्टिकको बोराभित्र बाँधेर हालेको अवस्थामा थियो।
घटनाको प्रकृति र प्रहरीको अनुमान
प्रहरीका अनुसार शव हेर्दा २–३ दिन अगाडि देखि नै पानीमा रहेको र ढाडिएको अवस्थामा छ। मृतक महिलाले रातो भेस्ट र जिन्सको पाइन्ट लगाएकी छिन्। महिलाको उमेर कतिपय प्रारम्भिक अनुमानमा २० देखि २२ वर्ष र कतिपयमा ३० देखि ३२ वर्ष आसपासको जस्तो देखिने उल्लेख छ। शवलाई बोरामा पोको पारेर खोलामा फालिएको हुनाले घटना अत्यधिक शङ्कास्पद रहेको र कसैले हत्या गरेर फालेको हुन सक्ने अनुमान गरिएको छ।
सूक्ष्म अनुसन्धान सुरु, पहिचान खुल्न बाँकी
घटनाको जानकारी पाउनसाथ इलाका प्रहरी कार्यालय दमकबाट प्रहरी नायव उपरीक्षक (डीएसपी) को कमान्डमा विशेष अनुसन्धान टोलीले घटनास्थलको कानुनी प्रक्रिया पूरा गरी घटनाको सूक्ष्म अनुसन्धान सुरु गरिसकेको छ। हालसम्म मृतक महिलाको नाम, थर र ठेगाना (वतन) खुल्न सकेको छैन भने शवको सनाखत हुन पनि बाँकी रहेको छ। जिल्ला प्रहरी कार्यालय झापाका सूचना अधिकारी एवं प्रहरी नायव उपरीक्षक खगेन्द्र बहादुर खड्काका अनुसार मृतकको बायाँ हातमा एउटा ट्याटु समेत रहेको छ। हाल सोही ट्याटु र हुलियाका आधारमा पहिचान खुलाउने प्रयास भइरहेको छ।
प्रहरीको अपिल
प्रहरीले ती महिलालाई हुलिया वा हुनुहुने अभिभावक, आफन्तजन, साथीभाइ वा छरछिमेकहरूलाई तत्काल नजिकको प्रहरी कार्यालय वा प्रहरीको निम्न सम्पर्क नम्बरहरूमा सम्पर्क गरी पहिचान कार्यमा सहयोग गरिदिन अनुरोध गरेको छः
प्रहरी नियन्त्रण कक्षः १००
सम्पर्क नम्बरहरूः ९८५२६७०६०९, ९८५२६९००३१, ९८५२६९०२३२
