काठमाडौं,२४ जेठ । स्वास्थ्य तथा खाद्य स्वच्छता मन्त्री निशा मेहेताले सञ्चारकर्मीहरूसँग सुझाव सहितको छलफल गर्नु भएको छ ।
आइतबार मन्त्रालयमा एक कार्यक्रमको आयोजनागरी मन्त्री मेहेताले सञ्चारकर्मीहरूसँग सुझाव सहितको छलफल गर्नु भएको हो ।
छलफलमा मन्त्री मेहेताले मन्त्रालयका कामकारबाहीलाई थप प्रभावकारी बनाउन सञ्चारकर्मीहरूसँग नियमित छलफल र सुझाव आदानप्रदान गर्ने बताउनु भएको छ ।
उहाँले सरकारको १०० बुँदे कार्यक्रम कार्यान्वयनमा केन्द्रित हुँदा यसअघि यस्तो अन्तरक्रिया गर्न नसकिएको स्वीकार गर्नुभयो । अब भने हरेक १५ दिन वा एक महिनाको अन्तरालमा सञ्चारकर्मीहरूसँग नियमित रूपमा छलफल गरिने उहाँको भनाई छ ।
उहाँले भन्नु भयो,‘हामीले यस्तो छलफल अलि पहिले नै गर्नुपर्ने थियो तर सरकारको १०० बुँदे कार्यक्रममा ध्यान दिँदा यतातिर ध्यान दिन पाइएन । अब निरन्तर रूपमा यस्ता छलफल गर्नेछौँ। सुझाव पनि लिनेछौँ र आएका सुझाव तथा सल्लाहलाई आत्मसात् गर्दै अघि बढ्नेछौँ।’
कार्यक्रममा सञ्चारकर्मीहरूले मन्त्रालयका कामकारबाही, स्वास्थ्य सेवा, खाद्य स्वच्छता तथा स्वास्थ्य बीमालगायत विषयमा विभिन्न सुझाव दिएका थिए। मन्त्री मेहेताले मन्त्रालयका कमी–कमजोरीबारे उठेका विषयलाई पनि सकारात्मक रूपमा लिँदै सुधारका लागि पहल गरिने बताउनु भएको छ।
उहाँलाई मन्त्री पदबाट बिदा हुन लागेको भन्दै पत्रकारले पनि प्रश्न गरेका थिए । त्यसको जवाफमा उहाँले हालसम्म आफूलाई त्यससम्बन्धी कुनै आधिकारिक जानकारी प्राप्त नभएको स्पष्ट पारिन्।
‘आधिकारिक रूपमा त्यस्तो केही आएको छैन,’ उहाँले भन्नु भयो।
त्यस्तै मन्त्रालयका सचिव डा। विकास देवकोटाले स्वास्थ्य बीमा सुधार सरकारको प्राथमिकतामा परेको बताउनु भयो । उहाँले आगामी आर्थिक वर्षमा स्वास्थ्य बीमा कार्यक्रमका लागि बजेट उल्लेखनीय रूपमा बढाइएको जानकारी दिनु भएको छ।
उहाँले भन्नु भयो,‘बीमा सुधारको विषय अहिले सरकारको प्राथमिकतामा परेको छ । विगतका वर्षमा करिब साढे सात अर्ब रुपैयाँ बजेट विनियोजन हुने गरेकोमा आगामी वर्षका लागि १५ अर्ब रुपैयाँ बजेट छुट्याइएको छ । त्यसैले स्वास्थ्य बीमा क्षेत्रमा सुधार हुने अपेक्षा गरेका छौँ । ’ उहाँले स्वास्थ्य बीमा कार्यक्रमलाई प्रभावकारी, दिगो र नागरिकमैत्री बनाउन मन्त्रालयले आवश्यक सुधारका कदम अघि बढाइरहेको पनि जानकारी दिनु भयो। सञ्चारकर्मीहरूसँगको छलफलबाट प्राप्त सुझावहरूले स्वास्थ्य क्षेत्रका नीति तथा कार्यक्रमलाई थप परिष्कृत बनाउन सहयोग पुग्ने विश्वास मन्त्रालयको रहेको उहाँले बताउनु भएको छ।
