काठमाण्डौं,१० असार । नेपाली राजनीतिमा फेरि एकपटक ठूलो वैचारिक भूकम्प गएको छ। हिजोसम्म राष्ट्रिय स्वतन्त्र पार्टी (रास्वपा) को पहिलो महाधिवेशनमा अतिथिका रूपमा पुगेर प्रधानमन्त्री बालेन शाहलाई ‘स्मार्ट, डाइनामिक र इन्टेलिजेन्ट’ भन्दै भारतीय अभिनेता देवानन्दसँग तुलना गर्ने जनमत पार्टीका अध्यक्ष डा. सीके राउत, अहिले तिनै बालेनमाथि आगो हुनु भएको छ्। मात्र तीन दिनको अन्तरालमा राउतको यो आक्रोशले राजनीतिक वृत्त तातेको छ।
विवादको मुख्य जड हो— रास्वपाको महाधिवेशनबाट पारित भएको ‘प्रदेश सभा खारेजी’ को राजनीतिक प्रस्ताव। यो प्रस्ताव आउनेबित्तिकै डा. राउतले बालेन शाहमाथि चरम राजनीतिक बेइमानी र जनतालाई धोका दिएको गम्भीर आरोप लगाउनु भएको छ।
राउतको आक्रोश छ— “भोट माग्ने बेलामा मधेसीको पहिचान अपनाउने, कुर्ता–गम्छा लगाउने, मधेसी भाषामै सम्बोधन गरेर ’प्रदेशलाई बलियो बनाउँछु’ भन्ने वाचाका साथ तराई–मधेसका अठतर मध्ये चौरतर सिट जितेर क्लिनस्वीप गर्ने; अनि शक्तिमा पुगेपछि त्यही प्रदेश सभा खारेज गर्ने एजेन्डा ल्याउनु ’खोलो तर्यो, लौरो बिर्सियो’ भन्ने उखान जस्तै हो।“
डा. राउतले प्रदेश खारेज गरिए मधेस पञ्चायती व्यवस्था जस्तै केवल प्रशासनिक इकाइमा सीमित हुने चेतावनी दिनु भएको छ्। यद्यपि, वर्तमान सरकारको गणितीय अवस्था हेर्दा तत्काल संविधान संशोधन सम्भव नभएकाले आत्तिहाल्नुपर्ने अवस्था नरहेको भन्दै उहाँले आफ्ना कार्यकर्तालाई ढाडस समेत दिनु भएको छ्। प्रत्यक्ष निर्वाचित कार्यकारी प्रमुखको बहसलाई समेत उहाँले अस्वीकार गर्दै व्यवस्थापिका र कार्यपालिकाको भूमिका स्पष्ट हुनुपर्ने अडान राख्नु भएको छ।
चुनावमा जनतासँग गरिएका वाचा र सत्तामा पुगेपछि लिइने नीतिबीचको यो विरोधाभासले नेपाली राजनीतिमा फेरि एकपटक नैतिकताको प्रश्न उठाएको छ। के यो एजेन्डाले मधेसको अधिकारलाई संकुचित पार्नेछ, या देशले नयाँ राजनीतिक दिशा लिनेछ? यो भने आगामी दिनले नै प्रष्ट पार्नेछ।
