विराटनगर,११ असार । कोसी प्रदेशका मुख्यमन्त्री हिक्मतकुमार कार्कीले प्रारम्भिक बाल विकासमा गरिएको लगानीले समग्र समाजको भविष्य निर्माणमा महत्त्वपूर्ण योगदान पुग्ने बताउनु भएको छ । कोसी प्रदेश संरचनामा प्रारम्भिक बाल विकासका लागि संवैधानिक अधिकार तथा दायित्व विषयक परामर्श कार्यक्रममा बोल्दै मुख्यमन्त्री कार्कीले घरका साना बालबालिकाले राम्रो शिक्षा–दीक्षा प्राप्त गर्न सके परिवारमा खुसीयाली र सकारात्मक वातावरण सिर्जना हुने बताउनु भएको छ ।
उहाँले बालबालिकाको शारीरिक, मानसिक तथा बौद्धिक विकासका लागि प्रारम्भिक बाल विकासलाई प्राथमिकतामा राख्न आवश्यक रहेको उल्लेख गर्नु भएको छ । बालबालिकामा गरिएको लगानीले दीर्घकालीन रूपमा समाज र राष्ट्रलाई नै लाभ पुग्ने उहाँको भनाइ थियो । मुख्यमन्त्री कार्कीले बाल अधिकार सुनिश्चित गर्न संघ, प्रदेश र स्थानीय तहबिच प्रभावकारी समन्वय आवश्यक रहेको बताउँदै प्रारम्भिक बाल विकासका कार्यक्रमलाई थप व्यवस्थित र प्रभावकारी बनाउनुपर्नेमा जोड दिनु भएको छ ।
प्रारम्भिक बाल विकासका लागि संघीय सांसदहरूको सहकार्य समन्वय समूहको आयोजनामा भएको कार्यक्रममा बालबालिकाको अधिकार, प्रारम्भिक शिक्षाको अवस्था तथा संवैधानिक दायित्व कार्यान्वयनका विषयमा छलफल गरिएको थियो ।
