दमक, २९ असार । धेरैले जन्मदिनलाई केक काटेर, शुभकामना साटेर वा रमाइलो गरेर मनाउँछन्। तर दमककी एक महिलाले आफ्नो जन्मदिनलाई मानवसेवाको अवसरमा रूपान्तरण गर्दै दिवंगत आमाबुबाको स्मृतिमा ३२ जना वेवारिसे नागरिकलाई भोजन गराउनु भएको छ। दमक–१ निवासी हार्डवेयर व्यवसायी डम्बर खड्काकी श्रीमती भगिमाया थापा खड्काले आफ्ना स्वर्गीय आमा छलिमाया थापा र बुबा कृष्णबहादुर थापाको स्मृतिमा दमक–२ स्थित मानव उद्धार सेवा आश्रम पुगेर त्यहाँ आश्रित ३२ जना वेवारिसे तथा असहाय व्यक्तिलाई स्वादिष्ट भोजन गराउनु भयो । गत शनिबार साँझ उहाँले जन्मदिनलाई व्यक्तिगत खुसीमा सीमित नराखी, आफूलाई जन्म दिने आमाबुबाको सम्झनामा समाजका अभावग्रस्त र बेसहारा नागरिकसँग खुसी बाँड्ने निर्णय गर्नुभएको थियो । आश्रममा पुगेर आफ्नै हातले भोजन गराउँदा त्यहाँका आश्रितहरू पनि भावुक र हर्षित बनेका थिए।
भगिमायाका श्रीमान् डम्बर खड्काले जन्मदिनको अवसरमा यस्तो अर्थपूर्ण सामाजिक कार्य गर्ने सोच ल्याएकोमा श्रीमतीप्रति आभार व्यक्त गर्नुभएकोछ। उहाँले यस्ता कार्यले समाजमा सकारात्मक सन्देश फैलाउने विश्वास व्यक्त गर्नुभयो ।
मानव उद्धार सेवा आश्रममा हाल ३२ जना वेवारिसे तथा असहाय नागरिकले आश्रय लिइरहेका छन्। उनीहरूका लागि एक छाक भए पनि माया, सम्मान र आत्मीयतासहितको भोजन उपलब्ध गराउन पाउँदा आफू अत्यन्त खुसी भएको भगिमाया थापा खड्काले बताउनु भयो । सानो देखिने यस्ता मानवीय कार्यले समाजमा सहानुभूति, सेवा र सामाजिक उत्तरदायित्वको भावना अझ बलियो बनाउने विश्वास गरिएको छ।
