दमकमा कारको ठक्करबाट अनियन्त्रित भएको साइकललाई मोटरसाइकलले ठक्कर दिँदा एक जनाको मृत्यु भएको छ।
दमक नगरपालिका–४ स्थित भाइरल रोडको संगम चोकमा हिजो साँझ कारले साइकललाई सामान्य ठक्कर दिएपछि अनियन्त्रित भएको साइकललाई मोटरसाइकलले ठक्कर दिँदा दमक–३ का ५३ वर्षीय रनबहादुर विष्ट र मेचीनगर–८ का ४६ वर्षीय मोटरसाइकल चालक दुर्गाबहादुर बस्नेत घाइते भएका थिए।
गम्भीर घाइते विष्टको उपचारका क्रममा आज बिहान ४ बजे बिर्तामोडस्थित बी एण्ड सी अस्पतालमा मृत्यु भएको जिल्ला प्रहरी कार्यालय झापाले जनाएको छ। मोटरसाइकल चालक बस्नेतको बिर्तासिटी अस्पतालमा उपचार भइरहेको छ।
दुर्घटनामा संलग्न कार, मोटरसाइकल र साइकल प्रहरीले नियन्त्रणमा लिएको छ भने कार चालक मोरङ उर्लाबारी–७ का ४० वर्षीय नेत्रप्रसाद तिम्सिनालाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ।
