काठमाडौं,१४ साउन । सिरहाको गोलबजारमा प्रहरीको गोली लागेर एक युवकको मृत्यु भएपछि त्यहाँको स्थिति अत्यन्तै तनावपूर्ण बनेको छ। घटनापछि आक्रोशित बनेका प्रदर्शनकारीहरूले गोलबजार स्थित सिरहा सुपरमार्केटद्वारा सञ्चालित ’एबी मल’मा आगजनी गरेका छन्। भदौ २४ गते भाटभटेनी सुपरमार्केटमा गरिएको आगजनीकै शैलीमा प्रदर्शनकारीले एबी मलमा आगो लगाएका हुन्। प्रदर्शनकारी उग्र बनेसँगै जिल्लाका विभिन्न स्थानमा तोडफोड र आगजनीका घटनाहरू तीव्र रूपमा बढिरहेका छन्।
स्थिति नियन्त्रण बाहिर जान थालेपछि अप्रिय घटना रोक्न जिल्ला प्रशासन कार्यालयले गोलबजारसहित सिरहाका विभिन्न संवेदनशील क्षेत्रमा कफ्र्यु आदेश जारी गरेको छ। यद्यपि, प्रदर्शनकारीले कफ्र्युको प्रवाह नगरी प्रदर्शन जारी राखेका कारण आदेश प्रभावकारी हुन सकेको छैन। स्थितिलाई साम्य पार्न सडकमा नेपाली सेनासमेत परिचालन गरिएको छ, तर तनाव मत्थर हुनुको साटो झनझन् चर्किएको छ।
