नुवाकोट,२३ कार्तीक । नुवाकोटको विदुरमा तीन जना सवार मोटरसाइकल दुर्घटना हुँदा तीनै जनाको मृत्यु भएको छ । सोमबार बिहान विदुर नगरपालिका–९ स्थित खड्कथोकमा मोटरसाइकल सडकबाट करिब एक सय मिटर तल खस्दा चालकसहित तीन जनाको मृत्यु भएको हो ।प्रहरीका अनुसार बिहान करिब ११ बजे बा.९९ प.८२०२ नम्बरको पल्सर मोटरसाइकल अनियन्त्रित भई सडकबाट तल खसेको थियो ।
दुर्घटनामा धादिङको खनियाबास गाउँपालिका–५ स्थायी घर भई हाल विदुर नगरपालिका–९ बस्दै आँउनु भएको ४७ वर्षीय बुद्धिमान तामाङ, विदुर नगरपालिका–१३ की ३१ वर्षीया बिन्दा थापा मगर र सोही स्थानकी २७ वर्षीया सुनिता थापा मगरको मृत्यु भएको जिल्ला प्रहरी कार्यालय नुवाकोटले जनाएको छ ।दुर्घटनामा गम्भीर घाइते भएका तीनै जनालाई उपचारका लागि जिल्ला अस्पताल त्रिशूली पुर्याइएको थियो । उपचारकै क्रममा उहाँहरूको मृत्यु भएको प्रहरीले जनाएको छ ।
प्रहरीले प्रारम्भिक रूपमा तीव्र गतिका कारण मोटरसाइकल अनियन्त्रित भई दुर्घटना भएको हुन सक्ने अनुमान गरेको छ । घटनाको थप अनुसन्धानका लागि प्रहरी निरीक्षकको नेतृत्वमा टोली परिचालन गरिएको छ ।
