धरान । धरान उपमहानगरपालिका १८ नम्बर वडा कार्यालयले आँखा शिविर सञ्चालन गरेको छ ।
शनिबार सम्पन्न शिविरमा १ सय १७ जनाले आँखा परीक्षण गराएका थिए । परिवर्तनका लागि सामाजिक अभियानको सहकार्य तथा सूर्य आई केयरको प्राविधिक सहयोगमा कार्यक्रम गरिएको हो ।
जाँच गरिएकामध्ये ११ जनामा मोतिया विन्दुको समस्या भएको थियो भने १५ जनाले चस्मा लगाउनुपर्ने देखिएको आँखा रोग विशेषज्ञ डा. इच्छा जोशीले जानकारी दिइन् ।
त्यस्तै ३० जनाको आँखा पुनः जाँच गर्नुपर्ने देखिएको छ भने १५ जना कमजोर दृष्टि भएका बिरामी भेटिएको उनले बताइन् । बालबालिकामा पनि आँखाको समस्या देखिएको छ ।
मोबाइल प्रयोगका कारण बालबालिकाहरूको आँखामा समस्या रहेको उनको भनाइ छ । कार्यक्रमको संयोजन तथा सहजीकरण अभियानका सल्लाहकार मोहन श्रेष्ठका अनुसार वडाका ज्येष्ठ नागरिकलाई लक्षित गरी निःशुल्क शिविर आयोजना गरिएको हो ।
वडाध्यक्ष नरेन्द्रकुमार राई प्रवीणले आँखा शिविरले वडावासी नागरिकलाई सहयोग पुगेको बताए । शिविरमा आँखामा सामान्य समस्या देखिएकाहरूलाई निःशुल्क रूपमा औषधि वितरण गरिएको थियो । आवश्यकता अनुसार चस्मा तथा आँखाको उपचार गर्न विशेष सहुलियतसमेतको व्यवस्था गरिएको परिवर्तनका लागि सामाजिक अभियानका अध्यक्ष विष्णु बरालले जानकारी दिए ।
