धनकुटा । चौबिसे गाउँपालिका धनकुटाले विभिन्न संस्थाहरूको सहयोगमा आफ्ना ७५ जना स्थानीय ज्येष्ठ नागरिकको निःशुल्क आँखाको अप्रेसन गरिदिएको छ ।
गाउँपालिकाले यही चैत १० गतेबाट एक हप्तासम्म विभिन्न वडामा सञ्चालन गरेको आँखा शिविरबाट छनौट भएका एक सय ७२ मध्ये ७५ जनाको आँखा अप्रेसन गरिएको हो ।
नेपाल नेत्रज्योति सङ्घ डा.रामप्रसाद पोखरेल आँखा अस्पताल धनकुटाको प्राविधिक सहयोग, नेत्रज्योति सङ्घ र सेभा फाउण्डेसनको सहयोग तथा चौबिसे गाउँपालिकाको स्थानीय व्यवस्थापनमा उनीहरूको आँखा अप्रेसन गरिएको हो।
गाउँपालिकाले एकहप्ते शिविरमा थप यही चैत्र १८ र १९ गते शिविर सञ्चालन गरेर मोतीविन्दु र आँखामा मासु पलाएका बिरामीहरूको अप्रेसन गरिदिएको हो । उनीहरूको कीर्तिपुर आँखा अस्पताल काठमाडौंका डाक्टर एरिक वैद्यसहित सात जनाको टोलीले उपचार गरेको आँखा अस्पताल धनकुटाका डाक्टर समिर चापागाईंले जानकारी दिए ।
अन्य बिरामीहरूको भने प्रतिकूल मौसम र केही अनियन्त्रित रक्तचापका कारण अप्रेसन हुन नसकेको चापागाईंले जानकारी दिए । मौसम खराब भएको कारण पहिचान भएका सबै बिरामीहरू उपचारमा आइनपुगेको चौबिसे गाउँपालिकाका अध्यक्ष राजकुमार लिम्बूले जानकारी दिए ।
‘अप्रेसन राम्रो हुन्न भन्ने गाउँमा गलत हल्ला फैलाइएकोले सबैजना नआएको बुझिएको छ’ लिम्बूले भने, ‘वडा तहमा बाँकी रहेकाहरूको उपचारका लागि कार्यपालिकाको बैठक बसेर थप निर्णय गर्नेछौँ ।’ अप्रेसन गर्नका लागि गाउँ–गाउँबाट आएका बिरामीहरूको बस्नेखानेलगायतका बन्दोबस्त गाउँपाालिकाले गरेको थियो ।
गाउँपालिकामा नै आँखा जाँच केन्द्र सञ्चालन भएको शिविरबाट विशेष गरेर स्थानीय ज्येष्ठ नागरिकहरू जो आर्थिक रूपमा विपन्न थिए, उनीहरू लाभान्वित भएको अध्यक्ष लिम्बूले जानकारी दिए । आफ्ना ७२ वर्षीय बुबा र ६८ वर्षीया फुपूको आँखा अप्रेसन गर्न गाउँपालिका आइपुगेका चौबिसे वडा नं. ३ का नेत्र बरालले यस शिविरबाट आफू ५० हजार भन्दा बढीको आर्थिक भारबाट मुक्त भएको जानकारी दिए ।
