झापा /
झापाको दमकमा शनिबार राति भएको सवारी दुर्घटनामा उर्लाबारीका एक युवाको मृत्यु भएको छ । दमक–९ बरगाछीस्थित राजमार्गमा पूर्वबाट पश्चिमतर्फ आउँदै गरेको प्र १–०१–०१५ प ४२५१ नम्बरको स्कुटरलाई सोही दिशातर्फ आउँदै गरेको प्र १–०२–०४३ प ८५२३ नम्बरको मोटरसाइकलले पछाडिबाट ठक्कर दिँदा दुर्घटना भएको थियो ।
दुर्घटनामा घाइते भएका मोटरसाइकल चालक उर्लाबारी–३ का ३० वर्षीय विवेक धिमालको उपचारका क्रममा मृत्यु भएको कोशी प्रदेश प्रहरी कार्यालयले जनाएको छ । स्कुटर चालक सोही स्थानका ३४ वर्षीय सोबित तामाङ घाइते भएका छन् । उनको निम्स अस्पताल दमकमा उपचार भइरहेको प्रहरीले जनाएको छ ।
