धरान / १६ वर्षअघि एक महिलालाई सामूहिक बलात्कारपछि हत्या गरी फरार रहेका दुई अभियुक्तलाई प्रहरीले पक्राउ गरेको छ । धरानस्थित इलाका प्रहरी कार्यालयले आइतबार सार्वजनिक गरेअनुसार पक्राउ पर्नेहरूमा धनकुटाको शहीदभूमि गाउँपालिका १ धाप बस्ने ५६ वर्षीय चन्द्रबहादुर राई र ४५ वर्षीय कल्पन राई रहेका छन् ।
उनीहरुले ०६४ मंसिर १९ गते २५ वर्षीया विवाहित महिला ललिता राईलाई साविक धरान ५ महेन्द्रपथस्थित बलभद्रेश्वर अरुणोदय धर्मशालाको २१८ नम्बर कोठामा ल्याएर पटकपटक बलात्कार गरेपछि घाँटी थिचेर हत्या गरेको बयान दिएको इलाका प्रहरी कार्यालय धरानका प्रहरी नायव उपरीक्षक नवराज मल्लले जानकारी दिए ।
फरार अभियुक्तहरू लामो समयसम्म नेपाल बाहिर बसेपछि फर्केर आएको अवस्थामा पक्राउ गरिएको प्रहरीले जनाएको छ ।
पक्राउ परेका उनीहरूलाई सुनसरी जिल्ला अदालतबाट १० दिनको म्याद थप गरी आवश्यक अनुसन्धान भइरहेको प्रहरीले जनाएको छ ।
