सोलुखुम्बु / सोलुखुम्बु माप्यदूधकोशी गाउँपालिका-५ काँकुकी डोल्मा शेर्पा बिहान सबेरै उठ्नुहुन्छ । उठेर भुटेकाे मकै पाेकाे पार्नुहुन्छ अनि निगुरो टिप्न जङ्गल जानुहुन्छ ।
उहाँ हप्तादिनभरि निगुरो टिप्नुहुन्छ अनि शनिवार सदरमुकाम सल्लेरीमा लाग्ने साप्ताहिक हाट बजारमा बिक्री गर्नुहुन्छ । निहुराे बेचेर आएकाे आम्दानीबाट उहाँकाे घरखर्च र बालबच्चाकाे पढाइ खर्च टरेकाे छ । जङ्गलमा यत्तिकै खेर जाने निगुरोको साग बेचेरै करिब १५ वर्षदेखि डोल्माले आफ्नो जिन्दगी धान्दै आउनुभएको छ । यही आम्दानीबाट उहाँले १० जनाको परिवार पाल्दै आउनुभएको छ ।
शेर्पा भन्नुहुन्छ ‘नगरे के गर्नु । हामी गरिबलाई कसैले ऋण पत्याउँदैन्, यही जङ्गलको निगुरो टिप्छु, बिक्री गर्छु र छोराछोरीलाई पढाउँछु, आम्दानीको अरु बाटो छैन । के गर्नु खै ।’
न्यून आय स्रोत भएकाहरूलाई वर्षातमा उत्पादन हुने निगुरो कमाइकाे आधार बनेकाे छ । वर्षातमा निगुरो बेचेर र हिउँदमा पिँडालु बिक्री गरेर डोल्माले हप्तामा ३ हजार रुपैयाँसम्म आम्दानी गर्नुहुन्छ । बिहान उज्यालो नहुँदै जङ्गल तथा खोलाखोल्सीमा पुग्ने डोल्मा बेलुका भएपछि मात्रै जङ्गलबाट फर्किने गर्नुहुन्छ ।
अहिले शेर्पा मात्रै हैन सोलुखुम्बुमा न्यून आय स्रोत भएका परिवारका थुप्रै महिलाहरुले निहुराे बेचेरै घरखर्च धान्दै आएका छन् । जङ्गल तथा खोलाखाल्सीमा उम्रिएको निगुरो बिक्रीबाट उनीहरुले घर खर्च टार्नेदेखि बालबालिकाको पढाइ खर्च समेत धानिरहेका छन् ।
