दमक/
कोभिडका बेला ३५ बेड क्षमता भएको कोभिड उपचार केन्द्र भनेर स्थापना गरिएको संरचना दमकमा अलपत्र बनेको छ ।
यहाँको वडा नं २ स्थित बेलडाँगीमा बनाइएको सो अस्पताल कोभिड पछि कुनै पनि प्रयोजनमा ल्याउन नसक्दा प्रयोग बिहिन बनेको यहाँका वडाध्यक्ष प्रजापति सापकोटाले उज्यालो खवरलाई जानकारी दिनुभयो ।
यसलाई के गर्ने भन्नेबारेमा नगरको स्वास्थय शाखाले पनि अहिले सम्म कुनै योजना नबनाएको दमक नगरपालिकाको सिनियर अहेव नगेन्द्र भट्टराईले बताउनु भयो ।
डेङ्गी अस्पताल सञ्चालन गर्ने भन्नेबारेमा नसोचिएको बताउँदै उहाँले भन्नु भयो ‘दमकको उत्तरी क्षेत्र र खासगरि शरणार्थी शिविरका शरणार्थीलाई लक्षित गरेर स्वास्थ्य केन्द्र बनाउने सोच भएको हो तर त्यो पनि होला जस्तो छैन । ’
उहाँका अनुसार पूनर्ःवासमा गएका भुटानी शरणार्थीहरुको संगठन इन्ट्रा फाण्उडेसशनले दमक नगरपालिकालाई एउटा एम्बुलेन्स दिने बारेमा सम्झौता भयो ‘हामीले त्यहि कोभिड अस्पताललाई शरणार्थी लक्षित स्वास्थ्य केन्द्र बनाउँ भनेर अर्को प्रस्ताव पनि राख्यौ तर दुरीका हिसावले टाढा हुने भन्दै उनीहरुले सो प्रस्ताव अस्विकार गरेकोले त्यो संरचनामा के गर्ने भन्नेबारेमा अहिले कुनै टुङ्गोमा पुगिएको छैन । ’ भट्टराईको भनाई छ ।
दमक नगरपालिकाको आर्थिक वर्ष २०८०/८१ को निती तथा कार्यक्रममा पनि सो अस्पताललाई केमा प्रयोग गर्ने भन्नेबारेमा उल्लेख नगरेकोले नगरकै वेवास्थामा परेको प्रष्ट हुन्छ ।
घोपाको कोभिड अस्पताललाई डेङ्गी अस्पताल बनाइयो
सुनसरीको धरान तथा कोशी प्रदेशका तराई क्षेत्रमा डेङ्गी संक्रमित बढ्न थालेपछि छुट्टै अस्पताल बनाइएको छ ।
यहाँको बीपी कोइराला स्वास्थ्य विज्ञान प्रतिष्ठानले ३० बेडको डेंगी अस्पताल सञ्चालनमा ल्याएको हो ।
प्रतिष्ठानको सेन्ट्रल इमर्जेन्सी र डेंगी क्लिनिकले धान्न नसकेपछि आइतबारदेखि छुट्टै डेंगी अस्पताल सञ्चालनमा ल्याइएको प्रतिष्ठानका कायममुकायम उपकुलपति प्रा.डा प्रल्हाद कार्कीले जानकारी दिनुभयो ।
कार्कीका अनुसार यस अघी कोभिडको समयमा सय बेड क्षमताको कोभिड-१९ अस्पताललाई अहिले तत्कालका लागि डेंगी अस्पतालको रुपमा परिवर्तन गरेको हो ।
पछिल्लो दुई दिनयता प्रतिष्ठानको ५० बेडको अब्जर्भेसन वार्डमा ८५ प्रतिशत बेड डेंगीका बिरामीले भरिएपछि छुट्टै डेंगी अस्पताल सञ्चालनमा ल्याइएको हो ।
