दमक/
डेङ्गु संक्रमण गाउँमा भन्दा बढि बजारमा रहेको दमक नगरपालिकाका स्वास्थ्य शाखा प्रमुख नगेन्द्र भट्टराईले बताउनु भयो ।
दमक नगरको बजारी क्षेत्रमा अनुगमन गर्ने क्रममा विभिन्न पसल, होटल तथा अन्य स -साना लघु एवं घरेलु उद्योगहरुको आसपासमा पानी जमेको भेटिएकोले यसको जोखिम बजारी क्षेत्रमा बढि देखिएको उहाँको भनाई छ ।
‘बजार क्षेत्रमा विभिन्न प्रकारका पसलहरु छन्, पसलको अगाडी वा पछाडि विभिन्न डिव्वाहरु फालिएका हुदा रहेछन् । ति डिब्बामा कहिले देखीको पानी जमेको भेटियो । पानीमा डेङ्गु फैलाउने लामखुट्टेका लार्भापनि देखियो । त्यसैले गाउँमा भन्दा बजारी क्षेत्रमा डेङ्गुको जोखिम बढि छ । ’ भट्टराईले उज्यालो खवरसँगको कुराकानीका क्रममा बताउनु भयो ।
आज दमक नगरपालिका वडा नं ६ ले बजारको अवस्था के रहेछ भनेर गरेको अनुगमनमा यहाँका विभिन्न गमला उद्योग, नयाँ घर बनिरहेका निर्माणाधिन क्षेत्रहरुमा, घरको छैट, घर अगाडी राखीएका गमला तथा बट्टाहरुमा लार्भा सहित पानी जमेको भेटिएपछि त्यसलाई नष्ट गर्ने काम गरिएको वडाध्यक्ष टेक बहादुर थापाले जानकारी दिनुभयो ।
मानव स्वास्थ्यलाई गम्भिर समस्या पार्ने भनेर विस्व स्वास्थ्य संगठनले समेत फगिङ नगर्नु भनेकोले लार्भा नष्ट गर्न बोतल बोतलमा मट्टितेल, फिनेल तथा मोविल लिएर हिड्ने गरेको र पानी जमेका ठाउँमा ती पदार्थ हाल्ने गरेको दमक नगरपालिका वडा नं ६ को स्वास्थ्य सेवाकेन्द्रका प्रमुख अहेव चेतन निरौलाले बताउनु भयो ।
यसबाट जोगिन हरेक घरमा पानी जम्न नदिने, पानी जमेका ठाउँमा त्यो पानीको नष्ट गरि त्यहि घरमै भएको मट्टितेल, फिनेल वा मविल हालेर लार्भा मार्न सकिने भन्नेबारेमा जनचेतना फैलाउने काम भइरहेको अभियानमा सहभागी हुनु भएका दमक नगरपालिकाका प्रमुख प्रशाषकिय अधिकृत डमरु प्रसाद निरौलाले जानकारी दिनु भएको छ ।
नगरका सबै वडाका हरेक टोलका प्रतिनिधीहरुलाई यसबारेमा अभिमुखीकरण समेत गरिसकिएकोले जोखिम भएको ठाउँमा नगरलाई खवर गरि स्वास्थ्य शाखासँग समन्वय गरेर डेङ्गु नियन्त्रण गर्न सबै लागि पर्नुपर्ने उहाँले बताउनु भयो ।
