दमक
नेकपा एमाले कोशी प्रदेशको प्रथम अधिवेशन शुक्रबार विराटनगरमा सुरु हुँदैछ । पार्टी अध्यक्ष केपी शर्मा ओलीले उद्घाटन गर्ने तय भएको अधिवेशनबाट नेताहरुले सर्वसम्मत नेतृत्व चयनको प्रयास गरिरहेका छन् ।
तर अधिवेशन अगाडि भइरहेको तयारीले भने अध्यक्षमा विनोद ढकाल र घनश्याम खतिवडाबीच मुख्य प्रतिस्पर्धा हुने देखिएको छ । अध्यक्षका आकांक्षी तुलसीप्रसाद न्यौपाने पछि हटेकाले पनि ढकाल र खतिवडाबीच प्रतिस्पर्धाको सम्भावना बलियो बनेको हो ।
एक नेताका अनुसार, पूर्व मुख्यमन्त्रीद्वय भीम आचार्य र शेरधन राई विनोद ढकालको पक्षमा खुलेका छन् । अग्नि खरेल, भानुभक्त ढकाल, गुरु बराल लगायत खतिवडाको पक्षमा छन् ।
खतिवडा पक्षमा लागेका नेताहरुले खतिवडालाई पार्टी अध्यक्ष ओलीको साथ रहने दाबी गरिरहेका छन् । ओलीसँग ढकालको सम्बन्ध बिग्रिएका कारण खतिवडाले समर्थन पाउने उनीहरुको तर्क छ ।
खतिवडा पूर्व सांसद तथा एमालेका पुराना नेता हुन् । केन्द्रीय सदस्य विनोद ढकाल मोरङ इञ्चार्ज हुन् । ढकाल र खतिवडा एमाले मोरङको पाँचौं जिल्ला अधिवेशनमा अध्यक्ष पदमा प्रतिस्पर्धा गरेका थिए ।
प्रदेश अधिवेशनका लागि ९९७ जनाप्रतिनिधि छनोट भएर आइसकेका छन् । थप ५० जना मनोनयन गर्न बाँकी छ । पालिका र जनसंगठनबाट छनोट भएर आएकाहरुको स्पष्ट लाइन नखुलेपनि दुवै पक्षको आधा–आधा उपस्थिति भएको स्रोतको दाबी छ ।
प्रदेशले मनोनयन गर्दा आफ्नो पक्ष कमजोर हुने देखिएपछि ढकाल पक्षले मनोनयन गर्न मानेको छैन । मनोनयन नभए प्रदेशमा ९९७ जना मात्रै प्रतिनिधि सहभागी हुनेछन् । प्रदेश कमिटी अध्यक्ष तुलसी न्यौपानेले मनोनयन गर्ने ५ प्रतिशतबारे छलफल भइरहेको बताए ।
