दमक/
राष्ट्रिय सभा निर्वाचनका लागि कोशी प्रदेशमा नेकपा एमाले र राष्ट्रिय प्रजातन्त्र पार्टीले सहकार्य गर्ने गरे लिखत सम्झौतानै भएको छ ।
एमालेले अन्य तर्फका उम्मेदवार परशुराम अधिकारीलाई ‘ब्याक’ गराएर राप्रपाका उद्धव पौडेललाई सहयोग गर्ने सहमति पत्रमा हस्ताक्षर गर्यो ।
एमालेले अब अन्यतर्फ राप्रपाका पौडेललाई सहयोग गर्ने र महिलातर्फ एमालेकी रुक्मिणी कोइरालालाई राप्रपाले सहयोग गर्ने सहमती भएको हो ।
आफ्नै उम्मेदवारलाई ‘ब्याक’ गराउनुको अर्थ के ?
एमालेका कोशी प्रदेश अध्यक्ष धनश्याम खतिवडा र राप्रपाका प्रदेश अध्यक्षले लिखितरुपमै तालमेल पत्रमा हस्ताक्षर गरे ।
कोशीमा राष्ट्रियसभाका लागि ३ सय ६७ मतदाता छन् । तीमध्ये ९३ जना प्रदेशसभा सदस्य हुन् । प्रदेशसभा सदस्यको मतभार ५३ हो । स्थानीय तहका २७४ प्रमुख तथा उपप्रमुखको मतभार १९ हुन्छ ।
स्थानीय तहमा नेपाली कांग्रेसका प्रमुख उपप्रमुख ११३ जना छन् भने एमालेका ११२, माओवादी केन्द्रका ३१, एकीकृत नेकपा समाजवादीका ७, जनता समाजवादी र राप्रपाका ४-४ र स्वतन्त्र ३ जना रहेका छन् । स्थानीय तहका २७४ जनप्रतिनिधिको ५ हजार २०६ हुन्छ । जसमा कांग्रेसको २ हजार १४७ मतभार, एमालेको २ हजार १२८, माओवादी केन्द्रको ५८९, नेकपा एसको १३३, जसपा र राप्रपाको ७६-७६ र स्वतन्त्रको ५७ मतभार रहेको छ ।
यस्तै ९३ सदस्यीय प्रदेशसभामा एमालेका ४०, कांग्रेसका २९, माओवादी केन्द्रका १३, राप्रपाका ६, नेकपा एकिकृत समाजवादीका ४ र जसपाका १ सांसद रहेका छन् । प्रदेशमा एमालेको मतभार २ हजार १२०, कांग्रेसको १ हजार ५३७, माओवादी केन्द्रको ६८९, राप्रपाको ३१८, नेकपा एसको २१२ र जसपाका ५३ मतभार रहेको छ ।
प्रदेश र स्थानीय गरेर एमालेको ४ हजार २४८, कांग्रेसको ३ हजा ६८४, माओवादी केन्द्रको १ हजार २७८, राप्रपाको ३९४, नेकपा एसको ३४५, जसपाको १२९ र स्वतन्त्रको ५७ मतभार रहेको छ । जसअनुसार गठबन्धनको मतभार ५ हजार ४७४ छ भने एमाले-राप्रपा गठबन्धनको कूल मतभार ४ हजार ६४२ छ ।
यसरी हार्नैकालागि किन तालमेल गर्नु परेको ? भनेर उज्यालो खवरले एमालेका कोशी प्रदेश अध्यक्ष खतिवडालाई प्रश्न गरेको छ । ‘राष्ट्रिय राजनिति हो । राजनितीमा जीत र हार चुनावको परिणाम पछि मात्रै भन्न सकिन्छ । हामीले जीत्नैकालागि विभिन्न रणनिती अपनाइरहेका छौ । ती मध्येको एक यो पनि हो । ’
