दमक, २८ साउन । धनीपुर्जा नपाएका गौरादह ४ र ५ का जग्गाधनीहरुका लागि धनीपुर्जा वितरणका लागि प्रक्रिया सुरु भएको छ ।
भूमि व्यवस्था, सहकारी तथा गरिबी निवारण मन्त्री बलराम अधिकारीले गौरादह ४ र ५ को जग्गा दर्तासम्बन्धी कार्य द्रुतगतिमा अगाडि बढाइने बताउनु भएको छ । गौरादह ५ स्थित नमूना पाहुना घरको सभाहलमा आयोजना गरिएको जग्गा दर्ता आदेश २०८१ कार्यान्वयनसम्बन्धी सरोकारवाला निकायसँगको अन्तरक्रिया कार्यक्रममा मन्त्री अधिकारीले जग्गा दर्तासम्बन्धी कार्य ६ महिनाभित्रमा समाधान गर्न मन्त्रालयले जिम्मेवारी बहन गरेको बताउनु भयो ।
हाल गौरादह ४ र ५ (साविक महारानीझोडा गाविस) का करिव ५ हजार विगाह जग्गा करिव साढे ७ हजार जना विगत ६ दशकदेखि धनीपुर्जाविहीन बन्दै आएका थिए ।
ती जग्गासम्बन्धी समस्या समाधान गर्न प्रधानमन्त्री ओलीको निर्देशनमा अधिकारसम्पन्न समिति गठन गरिएको बताउँदै काम थालिएको मन्त्री अधिकारीले बताउनु भयो ।
जग्गा दर्ताको पहलबारे जानकारी गराउँदै संविधानसभा सदस्य दिपक कार्कीले अघिल्लो पटक गठित भूमि आयोगले काम गर्न नसक्नुमा कानुनी जटिलता नै मुख्य कारण भएको प्रष्ट्याउनु भयो ।
कोशी प्रदेशसभा सभासद अम्बरबहादुर विष्टले सरोकारवाला सबैको साझा प्रयासबाट मात्रै यसलाई निराकरण गर्न सकिनेमा जोड दिनु भयो ।
गौरादह नगरपालिकाका नगर प्रमुख छत्रपति सुवेदीले कार्यसम्पादनमा नगरपालिकाले खेल्नुपर्ने सबै भूमिकाको लागि तत्पर रहेको बताउनु भएको छ ।
