दमक, २८ साउन / झापाको दमक ६ मा २८ वर्षअघि स्थापित मेची बहुउद्धेश्यीय सहकारी संस्थाले मुख्य कार्यालय रहेको सो वडालाई ‘मेची सहकारीको वडा’ बनाउने योजना अघि सारेको छ ।
संस्थाको २८ औं वार्षिक उत्सव र ३० औं साधारणसभाको सन्दर्भमा सोमबार आयोजित पत्रकार सम्मेलनमा विगत तथा आगामी योजनाको समीक्षाका क्रममा सो कुरा जानकारी गराइएको छ ।
संस्थाका अध्यक्ष नारायणप्रसाद भट्टराईले अवको वर्ष २ हजार ४ सय सदस्य थप गर्ने योजना सुनाउँदै दमक ६ का सवै घरपरिवारलाई मेची सहकारीको सदस्य बनाएर ‘मेची सहकारीको वडा’ घोषणा गर्ने योजना प्रस्तुत गर्नुभयो । उहाँले हालसम्म १२ वटा सेवा कार्यालय रहेकोमा मोरङको सुन्दरहरैंचामा पनि सेवा कार्यालय थप गरी आफ्नो प्रभाव विस्तार गर्ने योजना बताउनु भयो । उहाँले कर्जामा डेढ प्रतिशत ब्याज न्यून गरेर सदस्यलाई सहजता प्रदान गरिएको जनाउनु भयो ।
०५४ साल भदौ १२ गते २९ जनाबाट १ लाख ४५ हजार शेयर रकम जम्मा गरी अघि बढेको संस्थामा हालसम्म १६ हजार ३ सय ४८ सदस्यबाट ३ अर्ब ८७ करोड ८६ लाख भन्दा बढी वासलात जम्मा हुन पुगेको छ । यो वासलात गत वर्षको भन्दा ९.२० प्रतिशतले बृद्धि हुन पुगेको छ । ३७ करोड ४९ लाख माथि शेयर पुँजी भई संस्थाले १० करोड आम्दानी गरेको पनि पत्रकारहरुलाई जानकारी गराइएको छ ।
अचल सम्पत्तिमा लगानी नगर्नु, विनाधितो अस्वच्छ प्रतिष्पर्धामा जोखिम अवस्थामा ऋण नदिनु, सवै कारोबारलाई सुरक्षित गर्दै संस्थालाई योजनावद्ध रुपमा सञ्चालन गर्न सकेकोले कुनैपनि प्रकारका संकट आउँदा पनि संस्थाको गतिमा अवरोध नआएको अध्यक्ष भट्टराईले प्रष्ट्याउनु भयो ।
१४ शिर्षकबाट बचत संकलन र १२ शिर्षकबाट कर्जा लगानी गर्दै आएको संस्थाले ‘रुपैयाँ एक सेवा अनेक’ लगायतका सामाजिक सेवाका कार्यक्रम समेत सञ्चालन गर्दै आएको छ । आफ्ना १२ वटा सेवा कार्यालय रहेपनि कम्तिमा सात वटा इकाई मानेर प्रत्येक इकाईमा इकाईगत साधारणसभा गर्दै भदौ १२ मा प्रमाणिकरण साधारणसभा सम्पन्न गर्ने संस्थाको योजना रहेको छ ।
