दमक, ३० साउन / संघीय सरकारका भौतिक पूर्वाधार तथा यातायात मन्त्री देवेन्द्र दाहालले भौतिक पूर्वाधार क्षेत्रको व्यवस्थापनका लागि व्यवस्थित योजना बनाएर अघि बढ्ने बताउनु भएको छ ।
मन्त्रालयका अधिकारीहरु सहित सिन्धुपाल्चोकका विभिन्न स्थानको अनुगमनका लागि पुग्नु भएका मन्त्री दाहालले स्थानीय सहित पत्रकारहरुको जिज्ञासामा सो कुरा बताउनु भएको हो । यसबेला स्थायी प्रकृतिको सरकार बनेको दावी गर्दै मन्त्री दाहालले दिर्घकालिन कामका लागि डीपीआर बनाएर भौतिक पूर्वाधारको क्षेत्रमा व्यवस्थित काम अघि बढाउने बताउनु भयो । मेलम्ची खानेपानी आयोजनालाई बाढी सहितको प्राकृतिक कारणले बेला बेला समस्या सिर्जना गर्ने गरेको अवस्थामा यसलाई स्थायी समाधानको बाटो खोजेर निरन्तर सञ्चालन गर्ने जनाउनु भयो ।
अनुगमन्का क्रममा उहाँले अरनिको राजमार्गलाई जोखिमरहित र सुरक्षित बनाउने सन्दर्भमा निर्माण कार्यमा भइरहेको ढिलासुस्ति हटाई निर्माणको कार्य तीव्र बनाउन समेत निर्देशन दिनु भएको छ ।
मन्त्रालयका सचिव केशवकुमार शर्मा, सडक विभागका महानिर्देशक रामहरि पोखरेल सहित पुग्नु भएका मन्त्री दाहाल समक्ष स्थानीयले बाढी र पहिरोको उच्च जोखिम रहेको सिन्धुपाल्चोकका बस्तिलाई सुरक्षित बनाउन र सडक सञ्चालन सहज बनाउन माग गरेका छन् ।
सुनकोशी खोलामा निर्माणाधिन पुल निर्माणमा ढिलाई भइरहेको भन्दै पुल तथा सडकका संरचना निर्माणलाई गति दिनुपर्ने पनि स्थानीयको माग छ ।
