विराटनगर, ३१ साउन / कोशी प्रदेशमा डेंगु रोगको संक्रमण बढ्दो रुपमा रहेपछि यसको नियन्त्रणका विषयमा पालिकाहरुका प्रतिनिधिसँग छलफल चलाइएको छ ।
बितेका चार महिनामा प्रदेशमा पाँच सय ८२ जना डंगु सङ्क्रमित भएको र दिनदिनै संक्रमित थपिदै गएर यसको नियन्त्रणमा चुनौति थपिएको प्रदेश स्वास्थ्य मन्त्रालयले उल्लेख गरेको छ । उसले डेंगु नियन्त्रणका लागि बुधबार साँझ पालिकाका प्रमुख र उपप्रमुखहरुसँग छलफल गरी पालिकाहरुले समेत सक्रियता अपनाउन अनुरोध गरेको छ । लामखुट्टेबाट सर्ने डेंगु नियन्त्रणका लागि मुख्य रुपमा लामखुट्टेको बासस्थान नष्ट गर्ने अभियान सञ्चालन गर्नु आवश्यक रहेको कुरा छलफल भएको उल्लेख छ ।
यो प्रदेशमा साउन १ देखि २९ गते सम्ममा तीन सय ३४ जना सङ्क्रमित थपिएको धनकुटास्थित स्वास्थ्य निर्देशनालयका निर्देशक ज्ञानबहादुर बस्नेतले जानकारी गराउनु भयो । सो अवधिमा मोरङमा एक सय ९९, झापामा ३३, धनकुटामा ३२, सङ्खुवासभामा ३०, भोजपुरमा २५, ओखलढुङ्गामा १०, खोटाङमा तीन र तेह्रथुममा दुईजना सङ्क्रमित भएको उहाँले उल्लेख गर्नुभयो । डेंगु संक्रमणले झापामा एकजनाको मृत्यु समेत भएको छ ।
