पथरी, ३१ साउन / पथरी शनिश्चरे नगरपालिका, इलाका प्रहरी कार्यालय पथरी र औषधी व्यवस्था विभाग विराटनगरको संयुक्त टोलीले पथरी शनिश्चरे नगर क्षेत्रका चारवटा औषधी पसलमा सिलबन्दी गरेको छ ।
बिहीबार नगर उप-प्रमुख देवीमाया काफ्लेको संयोजकत्वमा गरिएको अनुगमन टोलीले ९ नम्बरको पुलचौकस्थित आचार्य एग्रोभेट औषधी पसल, ७ को बकैनाडाँडाको प्रेम लिम्बुको औषधी पसल सिल गरेको छ । दुवै औषधी पसलको दर्ता प्रमाण-पत्र नभएको र मिति सकिएका औषधीहरु समेत पसलमा भेटिएकोले सिल गर्नुपरेको औषधी व्यवस्था विभाग विराटनगरका फार्मेसी अधिकृत अनिल परियारले जानकारी दिनुभयो ।
यसैगरी, हेमराज चन्द्रवंशीले वडा नम्बर ६ को भातेगौडामा र ४ को सम्झना चौकमा सञ्चालन गरेको दुबै ठाउँको औषधी पसल पनि सिल गरिएको छ । अनुगमनमा इलाका प्रहरी कार्यालय पथरीका प्रमुख मोहन विक्रम दाहाल, नगरका स्वास्थ्य शाखाका सिअहेव एकराज खत्री, जनप्रतिनिधिहरु, सञ्चारकर्मीहरु र नगर प्रहरीको उपस्थिति रहेको थियो ।
