विराटनगर, ३२ साउन । कोशी प्रदेशका मुख्यमन्त्री हिक्मतकुमार कार्कीले आफू नियुक्त भएको एक सय दिनमा ६० वटा काम गरेको विवरण सार्वजनिक गर्नुभएको छ ।
विराटनगरस्थित मुख्यमन्त्री तथा मन्त्रिपरिषदको कार्यालयमा विशेष कार्यक्रम गरी उहाँले आफूले सय दिनभित्र ६० काम गरेको भन्दै सो को विवरण सार्वजनिक गर्नुभएको हो । प्रदेश सरकारले काम गरेन भन्ने गलत प्रचारलाई हटाउन पहिले सुरु भएर आफ्नो कार्यकालमा सम्पन्न भएका योजनाहरूलाई पनि समावेश गरेर सय दिनका उपलब्धि सार्वजनिक गरेको मुख्यमन्त्री कार्कीले उल्लेख गर्नुभयो । प्रदेश सरकारले गरेका कामहरू सही ढंगले जनतामाझ प्रचारप्रसार नभएकोले सयदिने उपलब्धि सार्वजनिक गर्नुपरेको जनाउनु भयो । केही महिनापछि कोशी प्रदेशमा विगत सात वर्षमा भएका विकास र प्रगति पनि सार्वजनिक गर्न लागेको मुख्यमन्त्री कार्कीले बताउनु भएको छ ।
प्रदेशमा वर्ष २०८१ लाई प्रदेश पर्यटन वर्ष घोषणा गर्नेदेखि विराटनगरको बरगाछी चोकमा ट्राफिक लाइट जडान गरेको विषयलाई पनि सय दिने उपलब्धिका रुपमा उल्लेख गरिएको छ । तेह्रथुमको ओख्रे र सुनसरीको हरिपुरमा निर्माण भएको सडक उद्घाटन, कोशीलाई पूणर्खोप प्रदेश घोषणा गरेको र धनकुटाको भेंडेटारमा निर्माण भएको स्काईवाक उद्घाटन गरेर सञ्चालन, मुख्यमन्त्री कार्यालयमा प्रदेशबासीको गुनासो सुन्न हेल्लो सीएम कार्यक्रम सञ्चालन, विपदको सूचना दिन प्रदेश पोर्टल सञ्चालन, प्रदेशका पाँच पालिकामा उद्यमशीलता कार्यक्रम सञ्चालन र प्रदेशमा जडीबुटी प्रशोधन केन्द्र खोल्न अध्ययन कार्यदल गठन गराएको लगायतलाई सयदिनको उपलब्धिमा राखिएको छ ।
त्यस्तै, संखुवासभा र चीनसँग जोड्ने किमाथाङ्का नाका खुलाएको, पहाडका ६ जिल्लामा भेटेरनरी उपचार केन्द्र सञ्चालन र विपदमा परेकाहरूलाई राहत तथा उद्धारमा सहयोग गरेको पनि उपलब्धिमा समावेश गरिएको छ ।
पाथिभरा, हलेंसी, बराहक्षेत्र धार्मिक क्षेत्र समिति, केचना कञ्चनजङ्गा पर्यटन समिति, संघीयता कार्यान्वयन र प्रदेश कानुन निर्माण कार्यदल गठन गराएको, चालु वर्षमै कोशी प्रदेशमा लगानी सम्मेलन गर्ने तयारी थालेको तथा दोस्रो आवधिक योजना निर्माण गरेर कार्यान्वयन थालेको पनि उपलब्धिका सूचीमा उल्लेख गरिएको छ ।
मुख्यमन्त्री कार्की गत वैशाख २७ गते तेस्रो पटक मुख्यमन्त्रीमा नियुक्त हुनु भएको थियो ।
