पथरी, ३ भदौ / मोरङको पथरी शनिश्चरे र कानेपोखरी क्षेत्रमा बढेको लागुऔषध कारोबार र वन्यजन्तु अपराध विरुद्ध इलाका प्रहरी कार्यालय पथरीले एकहप्ता भित्र उल्लेखनीय सफलता हासिल गरेको छ ।
इप्रका पथरीका डीएसपी मोहन विक्रम दाहालले सरुवा भएर आएपछि यसखाले सक्रियता बढेको देखिएको छ । इलाका प्रहरीकार्यालय पथरीले पत्रकार सम्मेलन गरी विभिन्न स्थानबाट ६ वटा घटनामा पक्राउ गरिएका १३ जना अभियुक्तलाई सार्वजनिक गरेको छ । प्रहरीले उनीहरुको साथबाट ब्राउन सुगर, सालकको खपटा, उनीहरुले प्रयोग गर्ने भारतीय मोटर साइकल र अटो रिक्सा पनि बरामद गरेको डीएसपी दाहालले जनाउनु भयो ।
भदौ १ गते कानेपोखरी गाउँपालिका ७ बाट मोटरसाइकलमा रहेका रंगेली नगरपालिका १ का ४५ वर्षीय गगन गच्छदार र सप्तरी कञ्चनपुर नगरपालिका ५ बस्ने ३५ वर्षीय बासुदेव सरदारलाई सालकको ८सय ५० ग्राम खपटासहित पक्राउ गरेको थियो । सोही दिन ४ केजी ५ सय ८४ ग्राम सालकको खपटा सहित उदयपुर बेलका ३ का ४८ वर्षीय कृष्णराज मगर, बेलका ६ का डिकबहादुर पुर्वछाने मगर र सप्तरी कृष्णसवरण गाउँपालिका १ बस्ने ५५ वर्षीय उमेशप्रसाद चौधरीलाई प्रहरीले पक्राउ गरेको थियो ।
साउन ३० गते पथरी शनिश्चरे ४ का ३२ वर्षीय सिमन परियारलाई ट्रमाडोल ११ सय १० क्याप्सुल र डिकोलिक ६,६०० चक्की सहित पक्राउ गरिएको प्रहरीले बताएको छ । लागुऔषध बोकेको परियारको को. २ ह १६१५ नम्बरको अटो पनि प्रहरीको नियन्त्रणमा छ ।
गत साउन ३१ गते भारतबाट नेपालमा लागुऔषध बिक्री गर्न आएका विहार प्रान्त जिल्ला अररिया बस्ने वर्ष २४ को मिथलेसकुमार मण्डल, वर्ष २६ को भास्करकुमार शर्मा र वर्ष २५ को सौरवकुमार पासवानलाई १० ग्राम ब्राउन सुगरसहित पक्राउ गरिएको थियो । साउन २० गते पथरी शनिश्चरे १० बाट रंगेली नगरपालिका ७ बस्ने वर्ष २४ को अभयकुमार भास्कर र सुनबर्षी नगरपालिका ७ बस्ने वर्ष १९ को हयत अलीलाई ७ ग्राम १७ मिलिग्राम ब्राउन सुगरसहित पक्राउ गरिएको थियो ।
पथरी शनिश्चरे ८ बस्ने वर्ष २५ को दिपेश माझीलाई साउन २१ गते ४ ग्राम ४८० मिलिग्राम ब्राउन सुगर सहित पक्राउ गरिएको छ । त्यस्तै साउन १९ गते ४ ग्राम ९५ मिलिग्राम ब्राउन सुगरसहित भारत अररिया बस्ने २१ वर्षीय मोहम्द इसराकलाई कानेपोखरी गाउँपालिका २ बाट पक्राउ गरिएको छ ।
वन्यजन्तु तस्करी सम्बन्धी प्रहरीले वन कार्यालयसँग समन्वय गरी अनुसन्धान अघि बढाएको जनाएको छ भने लागूऔषध लगायत सबै घटनाहरूमा थप अनुसन्धान भइरहेको इप्रका प्रहरीले जनाएको छ ।
जिल्ला प्रहरी कार्यालय मोरङका प्रमुख एसपी नवराज कार्की, नगर प्रमुख मोहनप्रसाद तुम्बापो, उपप्रमुख देवीमाया काफ्ले र १० नम्बर वडाध्यक्ष जीवन खतिवडाको रोहबरमा पत्रकार सम्मेलनमार्फत अभियुक्तहरुलाई सार्वजनिक गरिएको हाम्रा सहयोगी भूमिप्रसाद पाठकले जनाउनु भयो ।
