प्रधानमन्त्री देउवाले आज कोरोना परीक्षण गराउँदै

काठमाडौं : प्रधानमन्त्री शेरबहादुर देउवाले आज कोरोना परीक्षण गराउने भएका छन्।
कन्ट्याक्ट ट्रेसिङमा परेपछि हिजोदेखि आइसोलेसनमा बसेका प्रधानमन्त्री देउवाले आज पीसीआर परीक्षण गराउन लागेका हुन्।
सत्तारुढ गठबन्धनमा आबद्ध माओवादी केन्द्रका अध्यक्ष पुष्पकमल दाहाल प्रचण्डसहितका नेताहरुलाई कोरोना पुष्टि भएपछि देउवा कन्ट्याक्ट ट्रेसिङमा परेका हुन्।
बिहीबार र शुक्रबार बालुवाटारमा सत्तारुढ गठबन्धनमा आबद्ध दलका नेताहरु सम्मिलित राजनीतिक संयन्त्रको बैठक बसेको थियो। संयन्त्रमा रहेका माओवादी नेताहरुमा कोरोना पुष्टि भइसकेपछि हिजो देउवा प्रमुख प्रतिपक्षी दल नेकपा एमालेका अध्यक्ष केपी शर्मा ओलीलाई भेट्न बालकोट पुगेका थिए।
त्यसपछि देउवा बालुवाटार स्थित निवासमै आइसोलेसनमा बसिरहेका छन्। देउवाको स्वास्थ्यमा भने कुनै समस्या नरहेको उनको सचिवालयले जनाएको छ। यस्तै सूचना तथा सञ्चारमन्त्री ज्ञानेन्द्रबहादुर कार्की पनि आइसोलेसनमा बसेका छन्।
माओवादी अध्यक्षसँग सिंहदरबारमा वान टु वान छलफल गरेका कार्की पनि कन्ट्रयाक ट्रेसिङमा परेका थिए।