दमक, ४ भदौ/ मेची भन्सार कार्यालयले चालु आर्थिक वर्षको पहिलो महिना साउनमा अघिल्लो आर्थिक वर्षको भन्दा १५ दशमलव ९३ प्रतिशत बढी राजस्व संकलन गरेको छ ।
एक अर्ब २९ करोड पाँच लाख ३९ हजार राजस्व संकलन गरेको छ । गत आव २०८०/८१ को सोही अवधिमा एक अर्ब ११ करोड ३२ लाख ३१ हजार राजस्व संकलन भएको मेची भन्सार कार्यालय काँकरभिट्टाका सूचना अधिकारी गणपति कँडेलले जनाउनु भयो । उहाँले दुई आर्थिक वर्षको साउनको राजस्व तुलना गर्दा यो वर्षको साउनमा १५ दशमलव ९३ प्रतिशतले बढी देखिएको बताउनु भयो ।
मेची भन्सारबाट आयात १४ दशमलव ५४ प्रतिशतले बढ्दा निर्यात भने ३३ दशमलव ९८ प्रतिशतले घटेको पनि उहाँले जानकारी गराउनु भयो ।
चिया ३८ दशमलव ०८, प्याइउड, ४३ दशमलव ४९, भेनियर सिट पाँच सय तीन दशमलव ९७ र मोलासिसको निर्यात शतप्रतिशले बढेको कार्यालयको तथ्यांकले देखाएको छ । अलैँची ८३ दशमलव २८, अदुवा आठ दशमलव ८६, अम्रिसो २१ दशमलव ८८, छुर्पी ७८ दशमलव ७८ प्रतिशतले घटेको छ ।
आयाततर्फ पेट्रोल चार दशमलव ५८, डिजेल ११ दशमलव ८८, फलफूल ३८ दशमलव ४७ प्रतिशतले कमी आउँदा जुट १३ दशमलव ४६, एलपी ग्याँस २७ दशमलव ३७, जिप्सम ६७ दशमलव ९५, मेसिनरी तथा पाटपुर्जा ९६ दशमलव ५८, दलहन ६८ दशमलव ४९ र तरकारी एक सय ७७ दशमलव ६३ प्रतिशतले आयात वृद्धि भएको भन्सार कार्यालयले जनाएको छ ।
