दमक, ६ भदौ / दमक नगरपालिका वडा नम्बर ५ को प्रगति टोल । यहाँ रहेको खरखरे खोलाको किनारमा सुकुम्बासीको बस्ति छ । यो बस्तिमा समस्या बगरेल्ती छन् । नागरिकका आकांक्षा धेरै छन् । कतिपयले आफ्ना समस्या राख्न सक्छन् त कसैले स्पष्टसँग के माग्ने भन्ने मेसो नै पाउँदैनन् ।
सुकुम्बासी बस्तिमा नेताहरु चुनावका बेला भोट माग्न मात्रै आउँछन् भन्ने कुरालाई गलत सावित गर्दै झापा क्षेत्र नम्बर ५ (२) का प्रदेश सांसद होमबहादुर थापा सुकुम्बासी बस्तिमा के योजना चाहिएको छ, त्यसको पहिचान गर्न त्यहाँ पुग्नु भएको हो ।
सांसद थापासँग प्रत्यक्ष कुराकानी गरी सो क्षेत्रका नागरिकले आफ्नो माग राखेका छन् । उनीहरुको बस्तिमा पानीको भेल घरमै पस्ने गरेको छ । पानीको निकासकालागि कम्तिमा सुरक्षीत ड्रेन निर्माणको माग अघि सारे ।
वडाध्यक्ष इन्द्र गुरुङ सहितको टोली सो भ्रमणमा रहेका थियो । वडाको कुन क्षेत्रमा कस्ता योजना आवश्यक छ भन्नेबारेमा वडाध्यक्षलाईनै साथमा लिएर प्रदेश सांसदले घरदैलो गर्नु भएको हो । अवलोकन भ्रमणका क्रममा विपन्न परिवारले आफ्नो घर बनाउनै नसक्ने भएकोले सुरक्षित घर बनाइदिएर जग्गाको धनीपुर्जा समेत उपलब्ध गराइदिन स्थानीय हिरादेवी विश्वकर्मा सहितले माग राख्नुभयो ।
कहाँको अवस्था कस्तो छ भन्नेबारेमा वडाध्यक्ष गुरुङ जानकार हुनुहुन्छ । जसले गर्दा उहाँलाई समस्या पनि थाह छ र समाधान पनि । तर वडाको मात्रै सिमित बजेटले ती समस्याको समाधान गर्न पुगिरहेको हँुदैन । त्यसैले उहाँले यही क्षेत्रका प्रदेश सांसद थापालाई ल्याएर प्रदेशको बजेटमा योजना पारिदिएर सुकुम्बासी बस्तिभित्रका आवश्यकता पूर्ति गराउन पहल गर्नु भएको हो ।
समस्या धेरै छन् । आवश्यकता पनि कैयौं । तर श्रोत साधन अत्यन्तै सिमित । त्यसैले यस टोल बस्तिमा पुग्नु भएका सांसद थापाले नागरिकले राखेका मागलाई यही वर्ष पूणर् रुपमा पुरा गराउन नसकेपनि केही न केही काम चाहि गर्ने प्रतिवद्धता जनाउनु भएको छ ।
