दमक, १४ भदौ / सहरी विकास मन्त्रालयले निर्माण सम्पन्न हुन लागेको दमकको मदन डाँगी – ताराबारी डिपु सडक आयोजना देशमै उत्कृष्ठ भएको ठहर गर्दै दमक नगरपालिका कार्यालयलाई सम्मानित गरेको छ ।
सहरी विकास मन्त्रालय अन्तर्गत सहरी विकास तथा भवन निर्माण विभाग, नेपाल सहरी शासकीय तथा पूर्वाधार आयोजना अन्तर्गत १७ वटा पालिकाहरुमा प्रारम्भ गरिएको आयोजनाहरुमध्ये दमक नगरपालिकामा सञ्चालित मदन डाँगी – ताराबारी डिपु सडक आयोजना व्यवस्थित र प्रसंसनीय भएको भन्दै मन्त्रालयले प्रशंसापत्रले प्रशंसित गरेको हो ।
सहरी विकास मन्त्रालयका सचिव मणिराम गेलालले मन्त्रालयमा आमन्त्रण गरी दमक नगर प्रमुख रामकुमार थापालाई प्रशंसापत्र प्रदान गर्नुभयो ।
दमक १ र ५ नम्बर वडा हुँदै दमक ४ को ताराबारी डिपुसम्मको सो सडक दमकको नमूना सडकका रुपमा बन्दै गरेको छ ।
देशभरकै १७ वटा पालिकामध्ये दमक नगरपालिकामा पनि विश्वबैकको योजनामा सो सडक परेको हो । सडकको बीचमा हरियाली क्षेत्रको व्यवस्था गर्न एकै लहरका विरुवा रोपिने योजनामा उल्लेख गरिएको छ भने दुवै छेउमा पैदल यात्री र साइकल लेण्डसमेतको ब्यवस्था गरिने गरी निमाणर् कार्य भइरहेको छ । सडकको दुवैतर्फ बिजुली बत्तीको जडान गरिने र नाला निर्माण गरिने छ । पाँच किलोमिटर लम्बाई र १५ मिटर चौडाईको सो सडक निर्माणकालागि ४४ करोड २४ लाखमा ठेक्का सम्झौता भएको र सोही अनुसार काम भइरहेको दमक नगरपालिकाका इन्जिनियर अनन्त सेनेहाङले जानकारी दिनु भयो ।
विसं २०८२ असारसम्ममा सडक निर्माण सक्नुपर्ने सम्झौतामा उल्लेख छ । सो सडक सम्पन्न हुँदा दमक पश्चिमी क्षेत्रका स्थानीयलाई दमक बजारसँग जोडिन सरल भइ सहजता प्रदान हुनेछ ।
