पथरी, २२ भदौ । मोरङको पथरी शनिश्चरे नगरपालिकाले विद्यालयहरुले आफ्ना विद्यार्थीलाई जङ्कफूड (पत्रुखाना) खान र खुवाउनबाट पूर्णरुपमा निषेध गर्न परिपत्र गरेको छ ।
नगरको शिक्षा, युवा तथा खेलकुद शाखाले नगरभित्रका सबै सामुदायिक तथा संस्थागत विद्यालयहरूले विद्यार्थीलाई जंक फुड खान र खुवाउन पूर्ण निशेष गर्न सूचनामार्फत निर्देश गरेको हो । शाखाका अधिकृत नवीन खुलाल बुढाथोकीद्वारा जारी सूचनामा नगरभित्रका सम्पूर्ण सामुदायिक तथा संस्थागत, धार्मिक, वालविकास केन्द्र तथा मन्टेश्वरी विद्यालयहरू समेतलाई जङ्कफूड बिक्री नगर्न र नखुवाउन निर्देशन दिइएको छ । निषेधित क्षेत्रमा जङ्कफूड सेवन गराउने र वेचविखन भए गरेको पाइएमा नियमानुसार कारबाही हुने चेतावनी पनि दिइएको छ ।
सूचनामा भनिएको छ ‘विद्यालय दिवा खाजा व्यवस्थापन सहयोगी पुस्तिका, २०७७ को दिवा खाजा मेनु वा विद्यालय आफैले तयार गर्ने, खाजा मेनुमा स्थानीय कृषि उत्पादनलाई प्राथमिकता दिएर दिवा खाजाको रूपमा प्रयोग गर्न गराउन र जङ्कफूड पूर्ण रूपमा निषेध गर्नुहुन समेत अनुरोध छ ।’
