दमक, २३ भदौ । सेवा सुचारु गरेको १ वर्षपछि झापाको कमल गाउँपालिकामा रहेको कोशी प्रादेशिक आयुर्वेद अस्पतालले अन्तरंगसहितका आफ्ना सेवा विस्तार गरेको छ ।
कोशी प्रदेशका मुख्यमन्त्री हिक्मतकुमार कार्कीले आइतबार एक कार्यक्रमकाबीच विरामीलाई बेड भर्ना गरेर उपचार गर्ने लगायतका विस्तारित सेवाको उद्घाटन गर्नुभयो ।
अस्पतालमा एक्सरे, अन्तरङ्ग सेवा, इसीजी, भिडियो एक्सरे, जडिबुटीबाट औषधी उत्पादन, जीवन व्यवस्थापन पद्धती लगायतका सेवा तथा कार्यक्रमको उद्घाटन गरिएको हो । सो अवसरमा बोल्दै मुख्यमन्त्री कार्कीले उपचार पद्धतीका हिसावले प्रभावकारी र गुणकारी आयुर्वेद उपचारलाई थप व्यवस्थित बनाउन सरकारले कार्यदल समेत बनाएको बताउनु भयो । यसलाई आयुर्वेदको स्वास्थ्य विज्ञान प्रतिष्ठानका रुपमा विकास गर्ने प्रदेशको योजना रहेको समेत उहाँले सुनाउनु भयो ।
कार्यक्रममा प्रदेशका प्रमुख सचिव केदारनाथ शर्माले अस्पताललाई प्रतिष्ठानका रुपमा परिणत गर्दाका अवस्थामा गर्नुपर्ने भौतिक, आर्थिक र कर्मचारीको व्यवस्थापनका विषयमा जानकारी प्रस्तुत गर्नुभयो ।
सो अवसरमा बोल्दै अस्पतालका निमित्त निर्देशक डा. शिद्धार्थ ठाकुरले आयुर्वेदिक उपचारका लागि आफुहरुले हालसम्म गरेका प्रयास र अवको कार्यदिशाका बारेमा जानकारी गराउनु भयो ।
सुविधासम्पन्न तीनतले भवन निर्माणसँगै केन्द्रीय सरकार र प्रदेश सरकारका निकायबाट सो अस्पताल सञ्चालन गर्न सहयोग प्राप्त हँुदै आएको छ । स्थानीय सरकार र केही दातृ निकायहरुले समेत गरेको सहयोगबाट अस्पतालको सेवालाई थप विशिष्टिकृत गर्दै लगिरहेको जनाइएको छ ।
