दमक, ७ असोज । व्युटिसियनका रुपमा काठमाडौंमा समेत लामो समय खर्चेर व्युटिसियन क्षेत्रको प्रवद्र्धनमा सक्रिय कृष्णकुमारी पोखरेल (कृषा) ले पछिल्लो समय दमक ५ मा सो पेशालाई अघि बढाएर फरकपन प्रस्तुत गर्नुभएको छ ।
दमक ५ को वडा कार्यालय उत्तर दीपिनी आधारभूत विद्यालयको पूर्वतर्फ ०८० फागुन २३ गतेबाट ‘कृषा व्यूटिपार्लर एण्ड टेलरिङ सेन्टर’को सुरुवात गर्नुभयो । व्यूटिसियनमा सीटीइभीटीबाट मास्टर लेभलको प्रशिक्षकको प्रमाणपत्र प्राप्त उहाँले विभिन्न संघ संस्थासँगको सहकार्यमा व्यूटिसियन तालिम समेत सञ्चालन गर्दै आउनु भयो । अहिले दमकमा पनि आफ्नो पसल पार्लर र टेलरिङको तालिम सञ्चालन गरिरहनु भएको छ ।
मोरङको पथरी शनिश्चरे हुँदै विगत २५ वर्षदेखि व्यूटिसियन र टेलरिङ मास्टरका रुपमा सक्रिय उहाँले ११ वर्ष काठमाडौंमा रहेर काम गर्नुभयो । पूर्वको आफ्नै क्षेत्रमा रहेर नै पार्लर र कटिङमा आत्मसन्तुष्टि लिन स्थापना गरिएको पसलमा एकपटक आएका सेवाग्राही आफ्नो चुस्त कामको प्रभावले सधैं दोहोरिइरहने गरेको मीठो अनुभव छ उहाँसँग । आफु व्युटिसियनको तालिम दिनका लागि दुबई र मलेशियासम्म पनि पुगेर आफ्नो कलाको आयतन बढाउने अवसर पाएको सुखद पक्ष समेत उहाँले संगाल्नु भएको छ ।
उहाँको कामको प्रभावले टाढा टाढादेखि सेवाग्राहीहरु सेवा लिन आउने गरेका छन् । मोरङको पथरी शनिश्चरेदेखि धाएर समेत उहाँकोमा पार्लर सिक्न आउने गरेका छन् । पथरी शनिश्चरे ४ की एञ्जिला गिरीले धाउँदै पार्लर सिक्दै आउनु भएको छ । ‘उहाँको कामको कुशलता र व्यवहारवादी पक्षले धेरै कुरा सिक्ने अवसर मिलेको छ ।’– गिरीले भन्नु भयो । दमक ५ की वर्षा घिमिरे र सुस्मिता राईले पनि कृषाको पार्लर र टेलरिङ काम प्रभावकारी भएको बताउँदै एकपटक सेवा लिएर हेर्न अरुलाई आव्हान समेत गर्नुभएको छ । उहाँमात्र नभएर जनप्रतिनिधि, डाक्टरसहितका सवै पेशाकर्मी उहाँको सेवा लिन आकर्षित छन् ।
कृषाले म्यूजिक भिडियो, चलचित्रका पोशाक समेत निर्माण गर्दै आउनु भएको छ । साथै आवश्यक फेसनेवल पोशाक समेत तयार गरेर पसलमा राख्नु भएको छ । जीवन सिकाउँदै सीप प्रवद्र्धनको पहिलो खुड्किलो चढाउने काममा भनें हाल पथरी शनिश्चरे नगर उपप्रमुख रहनुभएकी देवीमाया काफ्लेको प्रमुख हात रहेको उहाँ स्मरण गर्नुहुन्छ ।
कलाकारिता क्षेत्रमा पनि सक्रिय उहाँले ३ दर्जन म्यूजिक भिडियो, नेपाली र भोजपुरीगरी १ दर्जन चलचित्रमा समेत साजसज्जाको काम गर्नुभएको छ । केहीमा अभिनय समेत गर्न भ्याउनु भएको छ । त्यसोत उहाँले चलचित्र र म्यूजिक भिडियो निर्माणको काम समेत गर्दै आउनु भयो । तर त्यसमा समूहको साथीबाट धोका पाएर ती क्षेत्रमा गरेको लगानी डुबेको तीतो अनुभव समेत छ उहाँसँग ।
त्यसो त उहाँसँग मसाज थेरापीको समेत राम्रो ज्ञान छ । त्यससम्बन्धी थाइल्याण्डमा स्पेशल कोर्ष पुरा गरेर त्यस क्षेत्रमा समेत काम गर्दै आउनु भएको छ । यी पाटोहरुसंगसंगै सुन्दरी प्रतियोगिता तथा फेसन शोहरुमा समेत सहभागिताको उहाँको अर्काे सृजनशील पाटो पनि छ ।
उहाँले साजसज्जा तथा कला क्षेत्र सम्बन्धी १ दर्जन अवार्ड प्राप्त गर्नुभएको छ । २०१७ मा व्यूटिसियन नेपाल कम्पिटिसन, २०१८ मा न्यू लूक फेसन शो, २०१८ मा भोजपुरी नेशनल मेकअप आर्ट कम्पिटिसन्, २०२२ मा फिल्म मेकअप आर्ट कम्पिटिसनलगायत उत्कृष्ठ अवार्ड प्राप्त गर्नुभएको छ ।
