दमक, कात्तिक ५ ।
झापाको दमक नगरपालिकाले हिजो कार्तिक ४ गतेबाट वडा वडामा राष्ट्रिय परियचयपत्र वितरण गरिने भन्दै सार्वजनिक सूचना जारी गरेपनि सो दिन पूर्व तयारीसहितको व्यवस्थापनको काम नसकिएकाले आजबाट वितरण थालिएको छ ।
भौतिक रुपमै उपस्थित भएर आआफ्नो राष्ट्रिय परिचयपत्र लिन नगरपालिका कार्यालयले सूचना गरे बमोजिम आज वडा नम्बर १, ५, ६ सहितका वडामा परिचयपत्र वितरण गरिएको छ । परिचयपत्र लिन सवैका लागि नगरपालिकाले आव्हान गरेको भएपनि अक्षरका आधारमा अल्फाबेट छुट्याएर पालो गरी वितरणको प्रक्रिया वडाहरुले अघि सारेका छन् ।
यस क्रममा कतिपय वडाले एबीसीडी र कतिपयले अआइई का आधारमा वितरणको प्रक्रिया अघि बढाएका छन् । वडा नम्बर १ ले एबीसीडीबाट नाम उठेकाहरुको आज वितरणको काम अघि बढाएको वडाध्यक्ष हरिप्रसाद न्यौपानेले जनाउनु भयो ।
वडा नम्बर १ मा ४ हजार ६ सयको संख्यामा परिचपत्र आएको छ ।
परिचपत्र लिन स्वयम् व्यक्ति उपस्थित भई हातका सवै औंलाको बायोमेट्रिक गरिनु पर्ने प्रावधान राखिएको छ ।
रातभरि व्यवस्थापनको काम गरेर विहानैबाट परिचयपत्र वितरण अघि बढाएको वडा नम्बर ६ का कार्यवाहक अध्यक्ष कमल श्रेष्ठले उल्लेख गर्नुभयो । उहाँले २०७७ सालमा खिचेको फोटोको चाँही यो बेला परिचयपत्र आएको जानकारी गराउनु भयो । उहाँले त्यहाँ ३ हजार ५ सय वटा परिचयपत्र कार्ड आएको जनाउनु भयो ।
पंजिकरण विभागले जिल्ला प्रशासन कार्यालयबाट कर्मचारी खटाएर परिचयपत्र वितरणको कार्य अघि बढाइएको छ ।
वडा नम्बर ५ ले अआइई बाट नाम उठेकाहरुबाट परिचयपत्र वितरण थालेको छ । वडा कार्यालय परिसर साँघुरो भएकाले स्थानीय दिपीनी आधारभूत विद्यालयमा परिचयपत्र वितरणको काम अघि बढाइएको वडाध्यक्ष इन्द्रबहादुर गुरुङले उल्लेख गर्नुभयो । उहाँले भन्नुभयो ‘औंलाको बायोमेट्रिक गर्ने एउटै मात्र मेसिन भएकाले थप मेसिन माग गरेर छिटो वितरणको प्रयास गरिनेछ ।’
दमक ५ मा ६ हजारको संख्यामा परिचयपत्र वितरण गरिने छ । परिचयपत्र भएपछि धेरै वटा कागजात बोक्न आवश्यक नभएको जानकारी गराइँदा आफुहरुलाई सहजता हुने सेवाग्राहीहरुले विश्वास लिएका छन् । तर त्यसको कार्यान्वयको पक्ष कति सबल हुन्छ भन्ने पनि सँगसँगै प्रश्न खडा भएको कार्ड लिएपछिको प्रतिक्रियामा ५ नम्बर वडाका समाजसेवी हिन्दबहादुर बुढाथोकीले बताउनु भयो ।
