झापाको दमकमा पनि बिहीबार महाकवि लक्ष्मीप्रसाद देवकोटाको ११६ औं जन्मजयन्ती मनाइएको छ ।
दमक प्रज्ञा प्रतिष्ठानका निवर्तमान अध्यक्ष हेमनाथ अधिकारीले देवकोटाको असाधारण प्रतिभाले नेपाललाई विश्वमा चिनाएकोमा नेपालीले गर्व गर्ने ठाउँ बनेको प्रसंग अघि सार्दै देवकोटा असाधारण व्यक्ति भएको चर्चा गर्नुभयो ।
कार्यक्रममा, विन्दु दाहाल मूकदर्शक, यादवप्रसाद अधिकारी झाँक्रीखोले, मेघनाथ बन्धु, विवेक क्षेत्री दुलाल, ओमप्रसाद खनालसहितले देवकोटासँग सम्बन्धित कविता प्रस्तुत गर्नुभयो ।
प्रतिभा निकेतनका पूर्व अध्यक्ष खेमलाल पोख्रेलको बिशिष्ठ आतिथ्यता रहेका थियो । कार्यक्रममा स्रष्टाहरु डा. लेखनाथ न्यौपाने, भूपेन्द्रराज तिम्सिना, दुर्गा काफ्ले , वीरेन्द्र खडका, गोपाल दहाल, प्रकाश भण्डारी , रधुनाथ भण्डारी, लता मिश्र, इन्दिरा भण्डारी, रामकुमार उपाध्याय, हिमाल सुब्बा गुराँस, गणेश गौतम, नारायणकृष्ण भण्डारी, नेत्र दहाल, भक्ता देवी दहाल लगायतको उपस्थिति रहेको थियो ।
साहित्य कला संगमका अध्यक्ष विष्णु न्यौपानेको अध्यक्षताको कार्यक्रममा प्रतिभा निकेतनका अध्यक्ष कमलराज भट्टराईले देवकोटाको योगदानका बारेमा चर्चा गर्नुभयो ।
देवकोटाका कृतिहरु हालसम्म ८ वटा भाषामा अनुवाद भइसकेका छन् । मुनामदन खण्डकाव्य, शाकुन्तल महाकाव्य सहितका उहाँका दर्जनौं कृतिहरु नेपाली साहित्यका असाधारण कलाकौशलताले भरिपूणर् प्रभावकारी सृजना सन्देश बनेका छन् ।
विसं १९६६ सालमा कात्तिक कृष्ण औँशी अर्थात् लक्ष्मीपूजाका दिन काठमाडौँको डिल्लीबजारमा जन्म भएका देवकोटाको निधन २०१६ साल भदौ २९ गते भएको थियो ।
नेपाली साहित्यमा आधुनिक महाकाव्य लेखनको थालनी गर्नुभएका उहाँको ‘मुनामदन’ खण्डकाव्य नेपाली भाषामा प्रकाशित हालसम्म सबैभन्दा बढी बिक्री भएको पुस्तक हो । नेपाली साहित्यमा स्वच्छन्दतावादी-प्रगतिवादी धाराका प्रवर्तक देवकोटाका रचनामा मानवतावाद, प्रकृतिप्रेम र क्रान्तिकारिता झल्कन्छ । उहाँका सृजनामा पूर्वीय र पाश्चात्य दर्शनको संयोजन पाइन्छ ।
