दमक, कार्तिक २८
असोजको दोस्रो साता परेको अविरल वर्षासँगै आएको बाढीले देशैभर ४३ राजमार्गको ८१९ स्थानमा सडक अवरुद्ध भएकोमा जसमध्ये हालसम्म ३६६ स्थानमा अस्थायी रूपमा पुनः निर्माण गरिएको छ । क्षति पुगेका १७ मध्ये १० पुलमात्रै अस्थायी हिसावले पुनः निर्माण भएका छन् ।
अस्थायी रूपमा सडकको पुनः निर्माण भएपछि ३६६ स्थानमा दुइतर्फी रुपमा यातायात सञ्चालन हुन पाएको छ भनें ४५२ स्थानमा एकतर्फी सञ्चालन आएको छ । बाढीले देशैभरका १७ वटा मोटरेबल पुलमा क्षति पुगेको थियो । जसमध्ये १० पुल अस्थायी रूपमा निर्माण सम्पन्न भएका छन् । बाँकी ७ पुल निर्माणाधीन र निर्माण हुने क्रममा रहेको सडक विभागको पुल महाशाखाका प्रमुख ललिजन खनालले जनाउनु भयो ।
पूर्वी पहाडी जिल्लालाई तराईसँग जोड्ने ठाँडी-भगवानपुर- लाहान-गाइघाट- खार्पा -सोलु राजमार्ग भनें अझै पनि अवरुद्ध रहेको खनालले बताउनु भयो । यस राजमार्गको उदयपुर र खोटाङ जोड्ने फोक्सिङटार पुल सुनकोशीले बगाएको थियो । सो पुल निर्माण हुन नसक्दा राजमार्ग चल्न सकेको छैन । पुल बगाएको स्थानमा जोड्न सरकारसँग बेलीवृज नभएकाले भारतबाट ल्याउन छलफल गरिरहेको उहाँले उल्लेख गर्नुभयो ।
उक्त पुल गौरीपार्वती वाईपी जेभी निर्माण कम्पनीले २०७३ चैत २२ गते सम्पन्न गर्ने गरी विसं २०६९ चैत २३ गते ठेक्का सम्झौता गरेर निर्माण गरिरहेको थियो । १० पर्छपछि २०७९ पुस ७ गते उक्त पुलको उद्घाटन गरी यातायात र मालबाहक साधन गुड्न थालिसकेको थियो । ढिलासुस्ती नगरेको भए २ वर्ष अगाडि निर्माण सम्पन्न हुनुपर्ने हो । यप्रोच सडक निर्माणको काम हालसम्म सकिएको थिएन । त्यसकारण अब निर्माण कम्पनीले नै पुनर्निर्माण गरिदिनु पर्ने महाशाखा प्रमुख खनालको भनाइ छ ।
